Pakistan-ah India an zin dawn lo - Arun Dhumal

Kumin Asia Cup chu August 31 - September 17, 2023 chhung hian Pakistan leh Sri Lanka ten an thleng dawn. Nimin khan Asia Cup fixtures tihfel a ni a, IPL chairman Arun Dhumal-a'n Pakistan-a an zin loh tur thu a nemnghet bawk.

Dhumal hi Durban-ah BCCI secretary Jay Shah nen an awm mek a, vawiin hian ICC Chief Executive Meet-ah an tel nghal ang. IPL chairman Arun chuan Asia Cup fixtures chungchangah Jay Shah-a'n PCB chairperson Muhammad Zaka Ashraf a biak thu a sawi.

Arun chuan, "Pakistan-in league stage match li an thleng ang a, Sri Lanka-in match kua an thleng ang. India leh Pakistan match hnih chu Sri Lanka-ah khelh a ni ang a, final-ah an inhmachhawn a nih pawhin Sri Lanka-ah khelh a ni ang," tiin a sawi.

Pakistan hian an ramah Nepal chauh ah hmachhawn dawn. Inkhel dang an thlen tur pathum chu Afghanistan vs Bangladesh, Bangladesh vs Sri Lanka bakah Sri Lanka vs Aghanistan te a ni.

Asia Cup-ah hian group A-ah Pakistan, Nepal leh India te an awm a, group B-ah Sri Lanka, Aghanistan leh Bangladesh te an awm thung. Group khat aṭanga a sang pahnih hi Super Four khel turin an tling ang. Super Four hi league bawka khelh tur a ni a, a sang pahnihin final an khel zui ang.