Lukaku-a'n Chelsea squad a zawm rih dawn lo

Premier League club Chelsea chuan an striker Romelu Lukaku chu pre-season training zawm turin an beisei lo a, khawthlang media-te chuan a chhuah dan tur an ngaihtuah mek niin an sawi.

Blues coach thar Mauricio Pochettino chuan kar hmasa lawk khan Lukaku chu pre-season training zawm tura a beisei thu a sawi a, mahse, thuthar berah chuan London club hian an striker hi a chhuah dan tur ngaihtuahin a aiawhte nen indawrna an kalpui mek.

Lukaku hi loan-a a khelh mekna Inter Milan chuan a ngheta lakluh an duh a, mahse, pound maktaduai 23-a lakluh an dilna chu Chelsea hian an lo hnawl tawh - Inter hian £30mtd leh a khelh ṭhat dan a zira pek belh turin lakluh an tum leh dawn nia sawi a ni a, Chelsea hian £40mtd an beisei thung.

Inter Milan hian kum 2019 khan Lukaku hi Manchester United aṭangin euro maktaduai 80-in an lalut a, an club player man to ber hian season hnih chhunga match 95 khelhsakin goal 64 ngawt a khung.

Hei chian Chelsea chil a tiput a, Belgian striker hi August 2021 khan £97.5mtd-in an lei. Mahse, match 44-ah goal 15 khungin beisei a phak lo a, Inter-ah loan-in a kal zui. Serie A club tan match 37-ah goal 14 khungin assist vawi sarih a nei a, ngai a awh leh mek.

Lukaku hi Serie A club tho Juventus leh sum tamna Saudi Arabian club Al Hilal te chuan lakluh tumin an dawr ve ve bawk nia sawi a ni a, mahse, Belgian striker hian a hmangaih hmasa Inter thutlukna a nghak phawt nia sawi a ni.

July 17 hian Chelsea hian pre-season tour nei turin USA an pan dawn a, hemi hma hian Lukaku chungchang hi chinfel hman an inbeisei.