Van der Sar-a'n ṭhat lam a pan

Ajax leh Manchester United goalkeeper hlui Edwin van der Sar chu ICU-ah la inenkawl chhunzawm zel mah se thih hlauhawm erawh a ni lo. Kum 52 mi Van der Sar hi thluaka thisen zam chat vangin damdawi inah a awm mek a ni.

Van der Sar-a nupui Annemarie chuan, "Edwin hi ICU-ah a la awm a, a dinhmun erawh a ṭha. Kan tlawh apiangin a biak theih a, thih hlauhawm a ni lo. Tun dinhmunah chuan kan dawhtheih a ṭul a ni," tiin a sawi.

Ajax chuan an kepeer leh chief executive hlui Van der Sar an thlawp a ni tih lantir nan Inrinni khan pre season match-ah goalkeeper kawr an ha vek a, Van der Sar hming a chuang bawk.

Van der Sar hian inkhelh a chawlhsan hnuah November 2012 aṭang khan Ajax board of directors-ah a tel a, season liam ta khan an chet ṭhat tawk loh avangin chief executive hna a chawlhsan. Ajax-a chief executive hna a thawh chhung hian Eredivisie nomawi vawi thum an chawi a, UCL semifnal an lut bawk. A inkhelh hun laiin Ajax, Juventus, Fulham leh Manchester United bakah Dutch national team tan a khel a ni.