Spurs player thar Manor Solomon

Tottenham chuan Manor Solomon chu Shakhtar Donetsk aṭangin kum nga chhung an hnena khel turin an lalut a, kum 23 mi winger hian season hmasa kha Fulham-ah loan-a hun a hman tawh avangin a mikhual hran lo.

Israel winger Solomon hian an ram club Maccabi Petah Tikva aṭanga a professional career zinkawng zawh ṭanin, January 2019 khan Shakhtar Donetsk a zawm a, Ukrainian club tan match 106 khrel hmanin, goal 22 a khung bakah assist vawi kua a nei.

July 2022 khan Fulham hi loan-in a zawm a, season hman zawh takah khan match 24 khelin goal nga a khung - Fulham-ah hian kum khatah pound maktaduai 1.7 hlawhin, bonus nen chuan £2.5 mtd thleng hlawh thei turin contract a ziak a, Israeli footballer zinga hlawh hnem ber a ni.

Spurs hian Solomon-a manah hian sum an seng lo a, hei hi a chhan ber chu FIFA-in indonain a nghawng rama player-te chu an club khelhnaa an contract an tihtawp a phalsak vang a ni - Spurs an vanneih phah.

Solomon hi Fulham boss Marco Silva pawhin chelh a duh a, mahse, ram tan match 35 a khelha goal sarih khungtu hian Spurs tana khelh a thlan zawk avangin Craven Cottage a chhuahsan.

Tottenham hi manager thar Ange Postecoglou hnuaiah an indinthar mek a, Solomon hma hian winger Dejan Kulusevski, goalkeeper Guglielmo Vicario leh England midfielder James Maddison te chu an lo lalut tawh bawk.

London club hian transfer bazar-ah an mit an la len reng bawk a, tlarhnung lam tihphui chu an ngaihtuah mek nia sawi a ni. Bayer Leverkusen defender Edmond Tapsoba leh VfL Wolfsburg defender Micky van de Ven te hming lam rik a ni.

Hetihlai hian Fulham defender Tosin Adarabioyo hming pawh sawi rik zingah a tel a, season hmasaa Barcelona aṭanga loan-a an hawh Clement Lenglet chu a ngheta lakluh chungchang an sawi bawk.