Khawvela footballer upa berin contract pawtsei

Khawvela professional footballer upa ber Kazuyoshi Miura chuan kum 56 mi ni tawh mah se inkhelh chawlhsan a tum lo a, a club khelh mekna Portuguese second division club Oliveirense-ah a contract a pawtsei.

Japan international hlui Miura hian January thla khan loan hmangin Yokohama aṭangin Oliveirense hi a zawm a, a contract sei zawng erawh puanzar a ni lo.

Kumin chhungin Miura hian minute 28 chauh a la khel a, substitute aṭangin vawi thum a lut. Yokohama leh Oliveirense club te hi neitu thuhmun an ni a, Japanese mi an ni.

Miura hi Portuguese season hnuhnung berah man of the match-ah thlan a ni a, he inkhelah hian minute 26 chauh khelin Oliveirense hian Leixoes 4-3 in an hneh a ni. An khingpui manager chuan man of the match-a Miura an thlang chuan inelna chu intihhlimna hmun ang maia a chhuah thu a sawi.

Japanese striker Miura hian Brazilian club Santos aṭangin kum 1986 khan a football career a ṭan a, kum 2005 aṭang khan Yokohama FC-ah a la awm. Chutihrualin kum 2022 khan loan hmangin a unaupa Yasutoshi enkawl fourth division club Suzuka Point Getters-ah loan a chhuakin match 18-ah goal hnih a khung.

Miura hian Italy, Croatia leh Australia-ah te pawh a inkhel tawh a, Japanese football legend hian ram tan match 89-ah goal 55 a khung. Kum 23 liam ta khan ram tana inkhelh hi a chawlhsan a, football erawh chawlhsan mai a la tum lo - kum 60 tlin thleng khelh a rilruk a ni.