Sane a chawlh rih a ngai dawn

Bayern Munich winger Leroy Sane chu a khup hliam vangin kar hnih chhung vel a chawlh a ngai dawn. Manchester City tan a khelh laia a hliam tawrh tawhna ngaiah bawkah a hliam leh a, tun ṭuma mi erawh a nasa vak lo nia sawi a ni.

German international Sane hi hliam vangin season hmasa khan a inkhel lo, coronavirus vangin season a tawp har a, inlan thei dinhmunah ding hman mah se Eithad Stadium chhuahsanin Allianz Arena a pan leh ta zawk.

Bayern coach Hansi Flick chuan, "Kan hma lawkah international match a awm dawn, chumi hnuah chuan kan kiangah inkhel tura a rawn kir leh theih tawh ka beisei," tiin a sawi a, nizana Borussia Dortmund nen Super Cup an khelh ṭum pawhin a inlan thei lo.

Sane hi hliam vangin tun kar tawpah Hertha Berlin a hmachhawn thei dawn lo a, ram tan pawh a inlan thei dawn lo. Nations League lama Germany-in Ukraine leh Switzerland an tum hunah a inkhel ve thei rih lo ang.

Bayern Munich hi Bundesliga champion tura rinkai ber an ni a, mahse an nomawi humhim tur chuan an fimkhur a ngai dawn niin a lang. An league match hnuhnung berah Hoffenheim lakah 4-1 ngawtin an tlawm a ni.