Barkley-a'n Villa a pan

Aston Villa chuan Chelsea midfielder Ross Barkley chu tun season chhung atan loan hmangin an hawh a, loan hmang thoa hawh an tum Ruben Loftus-Cheek erawh an lalut dawn ta lo.

Kum 26 mi Barkley hian 2018 January thla khan Everton aṭangin Blues a pan, Stamford Bridge-ah hian match 86 khel tawhin tun season bikah match thum a khelh aṭangin goal khat a khungsak tawh.

Villa manager Dean Smith chuan, "Ross te ang theihna nei sang tak kan lalut thei hian min ti lawm, ani hi kan team tan hmasawnna a thlen ngei ka beisei," tiin a player thar lakah beisei a neih san thu a sawi.

Season hmasa lama talbuai tak Villa hi tun season-ah erawh bul ṭan fuh berte zinga mi an ni, Premier League match hnih an khelh tawhah hnehna chang ve vein point ruk an hlawh chhuak der tawh.

Pathianni zan hian champion lai Liverpool nen an inhmachhawn dawn, Reds lakah hian midfielder thar Barkley pawh inlan thei tura beisei a ni.

Villa hian season hmasa lama an mangchhia ang kha kalsan tumin nipui bazarah an che na hle. Club player manto ber ni turin Ollie Watkins chu Brentford aṭangin pound maktaduai 33 zetin an lalut tawh.

Ligue 1 club Lyon aṭangin Bertrand Traore pawh pound maktaduai 17-in an lalut, Arsenal keeper Emiliano Martínez an lakna pawh pound maktaduai 20 a nih avangin sum an seng hnem tawh a, thlen san an tum ang.