Denmark Open lamah Srikanth

India tlangval badminton khel thiam Kidambi Srikanth chu October 13-19 chhunga khelh tur Denmark Open-ah a inlan dawn a, seeded parukna pek a ni - final hmain player ṭha a hmachhawn a ngai dawn.

March thla khan All England Open khelh a ni a, a hnu lamah erawh coronavirus vangin tournament pangngai a awm leh tawh lo. Hun rei tak hnuah inelna a awm leh dawn, badminton ngainatute tan chanchin ṭha a ni ang.

Denmark Open-ah hian Kento Momota leh Akane Yamaguchi te chu mipa leh hmeichhe singles huangah seeded chung bera awm an ni a, season tir lama an khelh dan thlir chuan champion tura rinkai an ni.

India nula PV Sindhu erawh Denmark lamah hian a inlan dawn lo. Rio Olympic silver medalist Shindhu hian, "Europe-ah zin ila, min lo khung hran a ngai dawn. Chumi hnuah India rama kan haw hnuah ni 14 khunghran ka ngai leh dawn bawk," tiin tournament a khelh loh tur chhan a lo sawi tawh.

Sindhu inlan dawn lo mah se London Olympic bronze medalist Saina Nehwal, Japanese star Nozomi Okuhara leh Olympic champion Carolina Marin te erawh an inlan dawn tih a chiang a, inelna hian ngaihhlut a hlawh ang.