Man City defender thar Dias

Manchester City chuan Benfica aṭangin pound maktaduai 65-in Ruben Dias an lalut. Kum 23 mi defender hian kum ruk daih contract a ziak. Portuguese club hian English club aṭangin pound maktaduai 13.7-in Argentine centre-back Nicolas Otamendi an lalut thung.

Pep Guardiola-a'n tun nipuiah defender Nathan Ake leh forward Ferran Torres te a lalut tawh a, Dias hi player lian tham pathum a lakluhna chiah a ni. Dias chuan, "Manchester City zawmna hun ṭha ka nei hi vannei ka inti a, bawhpelh ka duh lo. An club dinhmun chu an hlawhtlinna hian a sawifiah a, England-ah attacking football hmangin inkhel an thunun thei a, ka khelh dan nen a inrem a ni," tiin a sawi.

Portuguese defender chuan sawi chhunzawmin, "Player talent nei ṭha tak tak an awm a, world class manager Pep Guardiola enkawlna hnuaia awm a châkawm. A hnuaiah nasa takin hma ka sawn theih ka ring," tiin Man City manager a fak.

Vincent Kompany chhuah hnuah Man City hian Belgian defender thlakna an lalut lo a, season liam ta khan Fernandinho an hmang ṭhin. English club hian Dias hi dawr hma ni se pound maktaduai 60-in a lakluh theih a, amaherawhchu November 2019 khan contract thar ziakin tunah hian a release clause chu pound maktaduai 80 a ni tawh thung.

Pep Guardiola hian tlarhnung thuam chak nan Dias hi a duh ber niin a lang lo a, Spanish manager duh ber chu Kalidou Koulibaly a ni. Kum 29 mi Napoli defender dawtah hian Atletico Madrid defender kum 25 mi Jose Gimenez a la awm bawk. Amaherawhchu Senegal captain leh Uruguayan defender te hi pound maktaduai 80 bawr vela lakluh theih an ni a, English club sum sen phal zat aiin a tam zawk.

Chutihrualin Guardiola hian Man City a enkawl hnuah defender lakluh nan pound maktaduai 400 bawr vel a seng tawh! Rúben Dias (£65m) hma hian  João Cancelo (£58.5m), Aymeric Laporte (£58.5m),  Benjamin Mendy (£52m), John Stones (£50m), Kyle Walker (£47m), Nathan Aké (£41m), Danilo (£27m) leh  Angelino (£11m) te an lei tawh a, chutichung chuan tlarhnung a la pawp reng. Man City hian an match hnuhnung berah Leicester City 5-2 in an hneh lo a, goal nga an chhuah.