Chandigarh lakah Mizoram chak lo

India ram state hrang hrang cricket hmanga inelna Ranji Trophy-ah Mizoram chu Chandigarh lakah innings khat leh run 356 zetin an chak lo. Mizoram hian season kal laia an match hnuhnung atan February 12 hian Goa an hmachhawn leh ang.

Mahajan Cricket Academy Ground, Chandigarh-a inkhelah Mizoram lam hi ṭhumvawrah vannei zawkin vuak hmasak an thlang. Over 41.2-ah run 109 siamin an thi kim a, Chandigarh lamin over 110.1 chhunga wicket nga hloh chungin run 547 siamin 1st innings an duhtawk (declare).

Innings hnuhnung zawkah Mizoram lamin over 37 chhunga run 122 chauh siamin an thi kim leh a, an tan beisei tur a awm tawh lo. Mizoram tan hian Lalhruaia Ralte leh Sumit Lama ten wicket hnih ve ve an lak bakah tun hnaia khel ṭha ṭhin tak G. Lalbiakvela chuan wicket khat a la ve leh bawk.

Team 10 awmna Plate Group-ah Mizoram hi pasarihna an ni a, an hnuaiah hian Sikkim leh Arunachal Pradesh te an awm - an group aṭang hian Goa chu hmahruaitu niin knockout stage lut turin an dinhmun a ṭha.