MFA-in Lallianzuala Chhangte an chawimawi
Mizoram Football Association chuan India ram puma football ṭha bera AIFF-in a thlan Lallianzuala Chhangte chu July 12, Nilani zan khan HYVE Aizawl City Hall-ah an chawimawi.
LZ Chhangte lawmpuina leh chawimawina hunah hian MFA hruaitute bakah Lianzuala chhungkhat laina leh mi sawmte an kal a, Zonet kaltlanga pekchhuah niin en let duh tan Zonet YouTube channel-ah en tur a awm.
Hei le, LZ Chhangte
Lunglei Zonhnuai tlangval Lianzuala puala hun a ni bawk a, ding chhuak apiangin an fak. Mawi hnaia fak saltiah an ni lo, Lianzuala hian fak a phu ve hrim hrim.
MFA president Lal Thanzara leh MFA honorary secretary Lalnghinglova Hmar ten thiam takin LZ Chhangte an fak. MFA executive committee member Hmingthansanga'n AIFF Footballer of the Year chanchin ngaihnawm takin a sawi. (Page 10-ah dah a ni)
MFA chuan an fa chuam Lianzuala tan 'cake' an buatsaih a, MFA ECM Suzanne Ralte-in a buaipui. Lianzuala chuan, "Ka beisei phak bak a ni," tiin a sawi zui.
MFA finance secretary Lalruat-sanga Tochhawngin Lianzuala Chhangte hi chawimawina thuziak a hlan bawk.
LZ-a thukhawchang
Entu sing chuang hmaa zam ngai lo Lianzuala Chhangte hi kum rualpui zingah pawh lu zo tak a ni a, MFA-in an chawimawi zan erawh sawm bik 100 an tling lo chungin a zam thu a sawi.
Lianzuala chuan, "Zanin chu ka nghilh deuh dup mai. Tun ṭum ka lo haw chi kan la phi buai char char a, a ṭha lam zawng ni mah se a chauh thlak. Ka u te inneih kan mang zo chauh. Ka hman dawn lo emaw ka ti hial a, mahse MFA buatsaih a nih avangin ka ngai hlu hle a ni," tiin a puala hun bik a ngaihhlut thu a sawi.
Mumbai City winger Lianzuala hian a football zinkawngah MFA an pawimawh thu a sawi tel bawk.
Hun harsa bik
Lianzuala hian chanchin ngaihnawm tak a nei a, tarlan vek a leng lo. Chung zinga ngaihnawm bik chu chawimawina an pek zan hian a sawi chhuak. Amah enkawltu zinga mi pawimawh coach R. Lalmuankima a fak bawk.
Lianzuala ṭawngka
"Chennaiyin FC-a season tawp ber kha ka la hre reng. Hun harsa tak ka tawng a, season chhinchhiah tlak loh tak ka hmang. Rilru na takin Mumbai City FC kha ka pan a, ka duh huna pan pawh ka ni lo. Loan-a ka khelhna Mumbai-ah pawh duhthusam season ka hmang chhunzawm thei lo.
"Khami season zawh khan rilru na takin ka haw a, naupang lai aṭanga min training min pui ṭhintu Sir Muana te inah ka han leng nghal a. Engngati nge sir mite aia thawkrim vein ka inngai a, Pathian pawh theih ang tawkin ka bel ve asin le, tiin ka han vui nuah nuah.
"Tin, inhliamin min tlakbuak bawk a, khatih hunlai khan India team-ah min ko lo chhunzawm zel lehnghal nen ka hnual ve ngawih ngawih a, keimaha ka nuna ka hnual ber lai a ni ve hial maithei a ni.
"Anni hian chawlh lai pawhin ka hun hman dan hi chiang taka hriat avangin min lungawi loh pui ve em em mai a, pa rorum tak kha. Khami zan zet kha chu an nu nen khan an hnuk te pawh a ulh ve a, mahse kan ṭawngṭai a, engpawh ni se, hmalam panin kal leh phawt ang, tiin rilru kan siam. A tuk zing aṭangin a aia nasain bul kan ṭan a ni," a ti.
Lianzuala'n rim lehzualin a thawk a, a rah chhuah chu AIFF Player of the Year a ni. A tawpna a la ni lo a, hei aia sang thleng thei dinhmunah a ding.
----------------------
India rama mipui vaibelchhe 140 zinga footballer ṭha bera thlan kan chawimawi theih avangin Mizoram Football Association chu kan lawm takzet a ni.
DSK Shivajians Football Academy an dintirh khan Mizo player ṭhahnem tak an lak thlak avangin a neituten MFA aiawhin a hawnnaa tel ve turin min sawm a. Hemi ṭum hian Liverpool legend Jamie Carragher leh MFA aiawh chiah sawm kan ni.
Hetih hunlai hian Lianzuala hi AIFF Player of the Year-a an thlan ka la ring phak lo. Amaherawhchu kum 2016 a ni a, Jeje Lalpekhlua chu AIFF Player of the Year-a thlan a ni a, Mizo player zinga hetiang chawimawina dawng thei hmasa ber a ni.
Chumi hnu lawk hian SAFF Cup khel zoin Jeje leh Lianzuala te hi an rawn haw dun a, Tourist Lodge-ah Jeje chawimawina hun kan hmang. Hemi ṭum hian Lianzuala hi kil khatah a inthlahrung hle.
Tunah erawh MFA chu sawi loh AIFF hnuaiah hian India ram khawi hmunah pawh football khelmual a ni emaw football inkhawmpui a ni emaw eng level-ah pawh Lallianzuala Chhangte hi a inthlahrung thiang tawh lo. A kalna apiangah chawimawiin a awm zel tawh dawn a ni.
- Lalnghinglova Hmar,
MFA Honorary Secretary
----------------------
Lallianzuala Chhangte, Lunglei Zohnuai tlangval. MFA chhul chhuak kan ti thei ang chu. AIFF Player of the Year 2022-23 kan nei leh thei hi a lawmawm takzet zet a ni. Ani hian Mizote football khawvelah Mizote min chawisangin kan hming a ti ṭha mai ni loin MFA hming thlengin a ti ṭha tel a ni.
Lianzuala hi khelmual chhungah chauh ni lo, khelmual pawnah, a zin vei vahnaah pawh Pathian nena leng dun ṭhin. Pathian zahpui lo a, Pathian chawimawi ṭhin a ni te hi a ropui takzet a ni. A kal lehzelna turah pawh football khela Pathian rawngbawltu ropui tak ni zui zel turin kan duhsakna kan hlanin kan ṭawngṭaipui dawn bawk a ni. Puih a ngai a nih chuan engtik lai pawhin MFA kan inhawng reng ang.
- Lal Thanzara,
MFA President
----------------------
Ka football zin kawngah MFA a pawimawh em em a, Mizoram Premier League Playoff ka khelh khan tumruhna min siamin hmalam pan zel duhna min siamsak a ni
- Lallianzuala Chhangte,
AIFF Footballer of the Year 2022-23