No. 1 Alcaraz hmaah no. 3 Medvedev

Wimbledon an khelh ṭan dawn khan Carlos Alcaraz chu eng nge a thil tum tih an zawt a, Spanish tlangval hian ni danga a lo tih ṭhin tawh angin nui deuh sang chungin champion a tum thu a sawi - tun hma lama a sulhnu en chuan a thil tum hi huphurhawm tak a ni.

Mahse, tunah chuan Alcaraz hian Holger Rune lakah kawng tinrenga inkhel thunun chungin 7-6(3), 6-4, 6-4 in hnehna a chang a, semifinal a lut; zanin hian Daniil Medvedev nen final lut tur zawk an chingfel chhunzawm ang.

Semifinal hi Centre Court-ah vek khelh a ni tawh dawn, match hmasa zawk hi dar 6:00-ah an ṭan dawn, a hnuhnung zawkah Jannik Sinner leh Novak Djokovic te an inhmachhawn ve leh bawk ang.

Alcaraz a nghet

Nilaini zana Alcaraz leh Rune te inkhel hian mellung an phun, Open Era (kum 1968 chin) chinah kum 21 hnuai lam pahnih Wimbledon quarterfinal-a an intawn hmasak ber a ni hial, tunlai player chhuak thar hmuhnawm zinga mi an ni.

Kum 20 mi Alcaraz hi kar khat chauhin Rune ai hian a naupang zawk, an inhnaih vet vet hle. An kum la tam lo mah se khelmual chhungah an puitling tawh a, a ṭha pahnih inkhelah world number 1 chu a tir aṭangin a chungnung zawk.

World number 6 Rune hian inkhel tir lamah a khingpui service chhuhsak theihna remchang nei ve mah se, seeded pakhatna hian ace hmangin a hnukkir a, a hnu lamah chuan Danish player tan hun remchang dang a awm zui tawh lo.

Seeded parukna Rune chuan, "Ka theihna zawng zawngin ka bei a, point hnuhnung ber thleng khan theihtawp takmeuh ka chhuah. Carlos khan a khel ṭha lutuk a, kei aia a khelh ṭhat zawk miau avangin a tihngaihna a awm lo," a ti.

A mak zawk

Darkar hnih leh minute 20 an inkhelh hnuah Alcaraz a chak a, inkhel boruak sangah a zam lo tih a lantir bakah player ṭha lakah a ding khawng thei hle. World number 10 chin a hmachhawn tawh vawi sarihah ṭum ruk a chak - a hneh loh awmchhun hi Novak Djokovic a ni.

Alcaraz chuan, "Ka naupan lai aṭang khan Wimbledon khelh hi ka châk ve ṭhin a, sang tak thleng ve ila tih hi ka duhthusam a ni ṭhin. Chu duhthusam ramah chuan ka cheng mek a, a mak pawh ka ti zawk hle a ni," tiin a sawi.

Kum 2007 khan khatih laia kum 20 mi chauh Djokovic chuan Wimbledon semifinal hi a lo lut tawh, ani hnu lamah chuan Alcaraz hi grass court inelna lian bera semifinal lut leh thei hmasa ber a ni hial.

Semifinal thlir lawkin Alcaraz chuan, "Semifinal pawh hi nuam ti takin ka khel tawp ang, tunlaia ka khelh danah hian ka lungawi. Daniil Medvedev hian grass-ah ṭha takin a khel mek, player ṭha bik a nih bawk avangin thil erawh a harsa dawn," a ti.

Hmabak Medvedev

Quarterfinal inkhel dangah Chris Eubanks chu 6-4, 1-6, 4-6, 7-6(4), 6-1 in a hneh, 6ft 6in a sang Medvedev hian amah aia inches khata sang zawk a hneh a ni a, player pahnih hian service an nei ṭhain an ball vuak a hlauhawm thei takzet.

Kumin Wimbledon chu season dang aiin ruah leh thil dangin a tibuai ngun deuh zawk emawni tih mai tur a ni. Court One pawh a chung khuhna hman lailawk leh a ngai a, thawm a bengchhen deuh bakah boruak a uapin match dang nen a inang thei lo.

Russian tlangval Medvedev chuan, "Set khatna kan khelh aṭang khan thil a awlsam dawn lo tih ka hrethiam a, set nga khelh tlin ngai loa chak tlang theih hram dan kha ka ngaihtuh ngar ngar a, ka tihlawhtling thei hram.

"Alcaraz ka hmachhawn hunah chuan aces tam zawk ka siam theih a ngai dawn a, grass court-a ka match khelh tawh zinga a ṭha ber a nih a ngai bawk ang," a ti. Eubanks laka ṭum 28 ngawt aces a siam chu Alcaraz hneh nan chuan a tawk zawh a ring lo.