AIFF Player of the Year 2022-23 : Lianzuala Chhangte chanchin

Mizoram Premier League Season 3 Playoff khelh a nih khan Lunglei FC chuan rawlthar duhawm tak an rawn hruai a, kum lamah nau deuh mahse playoff-ah goal sarih khungin top scorer a ni zui a. Kha kha Zo football lover-ten Lallianzuala Chhangte kan hmelhriat ṭanna leh a hming kan chhinchhiahna hmasa te pawh a ni awm e.

Hun a kal a, thil a danglam a, khelmual chhung leh pawnah hlimna leh lawmna tam tak a tawng chho a. Chung karah chuan beidawnna leh harsatnaten a hlahthlem ngawt a rem bik lo a, harsatna leh buaina te amahin a ching fel thei lo, rinchhan tur dik tak Pathian a ring a, chhuan tur dik tak Pathian chu chhuan berah a nei a. Kum 2023 a lo her chhuah meuh chuan Indian football-ah hnehna hlado chamin, thang a chhuah. All India Football Federation Men's Footballer of the year 2023 atan Zo tlangval Lallianzuala Chhangte chu thlan a lo ni ta.

Kum 2014 khan DSK Liverpool International Football Academy a awm tur zawngin an coach te India ram hmun hrang hrangah an kal kual a. Mizoramah pawh Mizoram Football Association te nen ṭang tlangin Aizawlah trial an huaihawt a. Mizo naupang sang chuangin trial hi hmachhawnin, Lianzuala pawh Lunglei aṭangin a rawn kal a. Vanneihthlak takin thlan chhuah tlem te zingah a tel zui a ni.

He academy a awm chhung hian an coach Ray Curtis leh Michael Rice te mit a tlung hle a ni ang. Academy-a a awm pui Jerry Mawihmingthanga nen Liverpool ho training-na hmun Melwood training ground-ah ni 10 chhung zet training an zuk nei nghe nghe. Lianzuala a awmna academy DSK Shivajians chuan kum 2014 -15 season khan I League Under 19 an khel a, goal 16 thuntu Lianzuala chu top scorer a ni zui nghal.

CVL Hriatpuia leh Lalroliani, Lunglei Zohnuai te fa pali zinga naupang ber dawttu Lallianzuala Changte hi Mizo naupang dangte ang bawka football khelh nuam ti mi a ni a. Lungleia football coach Muankima ke bula seilian a ni. LZ-a hi a ke chheh a dik zaih a, ball pet a zei thlarh a. A rualpuite zingah danglamna a nei a, chu chu goal a thun theihna leh a tlan chakna te lansarh puiin, a puitlin hnuah pawh a hming chherna ber pakhat a ni zui.

Kum 2016 May thla khan ISL Club North East United chuan Lallianzuala hi loan-a an lak thu an puang a. Football academy a awm lai ISL club meuhin an la kha player hmabak êng tak nei a ni tih an nemnghet a. Beiseina sang tak nen North East United hi zawm mah se, beisei angin thil a kal vek thei lo thung. A kum a la naupan vang leh tawnhriat a la neih tlem vangte pawh a ni ang, khelhna hmun a chang tam lo.

Hetih hun lai hi Lianzuala football zin kawnga hun harsa, beidawng rum ruma a awm hun laite pawh a ni ngei ang. Khelhna hmun a chang tam lo te, a beisei ang a thil a kal lo te chuan amah a chher hriam a, chak lohna chu chakna hmanruaah hmangin, hman tlak leh chhawr tlak ni tumin, North East United chhuahsanin DSK Shivajians-ah a let leh a, senior team tan I League-ah inlanin, hmasawnna hmuh theihin a lang nghal thung.

Naupang te ni chungin kum 2015 SAFF Championship khel turin koh a ni a. Kum 2015 Krismas ni tak khan India leh Sri Lanka te inhmachhawnin minute 77-ah lutin India tana a vawi khat nan a inlan a, khatih hun lai khan India tana khel thei player 502-na chiah a ni. He tournament-ah vek hian December 27-ah Nepal nen an inkhelh ṭumin India senior team tan a goal hmasa ber a thun a. He goal a thun hmang hian record thar siamin India tana goal thun thei naupang pathum zingah chhiar tel a ni zui a. Chutih lai chuan kum 18 leh ni 140 mi chauh a ni.

Lallianzuala hi goal a thun theih piah lamah a tlan chak a, a hming lemah 'Mizo Flash' tia sawi ṭhin a ni. Delhi Dynamos a khelh laia FC Pune City nen an inkhelh ṭuma a goal thun, ball khalh chunga a tlan kha khatih hun lai Indian media te titi tui a ni. Khami ṭum khan ball khalh chunga a tlanchak zawng kha darkar khat a kilometre 35.80 a chak a tlan angin record a ni a.

Ball khalh chunga tlan chak zawng record hrang hrang han bih kualin khawvel huapah pawh a chak zual player sawmhnih zingah a lang phak hial awm e. Lianzuala hian India ram mai ni lo Europe aṭang pawha player an it zingah telin Norway club Viking FK ah te pawh trial-a han nei tawh. Indian player European club ten an enchhin hi kutzungṭang thliah tham lek an la awm.

India ram league sang ber Indian Super League khelh ṭan a nih aṭanga chhiarin goal thun tam zual paruk zingah a tel a, tunah hian goal 30 thun tling tawhin Indian player zingah pahnihna a ni mek. ISL a player inlan tam sawm zingah a tel phak a, Hero of the League nihna hauh thei mi pakua awm tawh zingah Indian pahnih chauh an la lang phak a, chung zinga pakhat chu Lallianzuala Chhangte hi a ni.

ISL khelh tawh chinah Lianzuala hian Hero of the match award ṭum kua a dawng tawh a, Emerging player of the match award vawi 12 a dawng tawh bawk. 2022 -23 Season-ah phei chuan Indian player zinga goal thun tam ber a ni a, goal 10 a thun a, assist nei hnem player panga zingah pawh a lang phak nghe nghe.

Lallianzuala Chhangte hi India tan age level hrang hrangah a inlanin, India U 19 team-ah ṭum li khelin goal hnih a thun a, India U 23 team-ah ṭum kua khelin goal nga a thun. India senior team tan vawi 28 inlan tawhin goal sarih a thun tawh a ni. Club hrang hrang tan vawi 157 khel tawhin club level ah goal 39 a thun tawh bawk.

Lallianzuala Chhangte hi taimakna kawngah a thatchhe lo a, invawn theihna kawngah a inthlahdah lo a, ei tam aia ei dik ngai pawimawhtu a ni. Footballer ni mek leh Footballer nih tumte tana zirlaibu nih tling a ni a. Hindi thiam a duh vangin tun hnai khan online tutor a ruai hial a. Engkim dang zawng aia Pathian dah pawimawhtu, Mizo nih tinuamtu leh he hnam sang tak min chawitu Lallianzuala Chhangte hi football khawvelah lo lian zual zel turin duhsakna kan hlan e.