Saudi an hrang zel - Savic a lut; Hendo & Mitrovic pawh?

Tun nipui transfer-a thawm na ber chu Saudi Pro League an ni tlat - Europe lam hawiin an bazar a, European top five league-te pawh an ṭang zo meuh lo!

Lazio midfielder ṭha mi Sergej Milinkovic-Savic pawh Premier League lama hmuh châka ring kan lo fan awk awk laiin Saudi Pro League lamah a kal a, Al-Hilal a zawm daih.

Al-Hilal vek hian Fulham striker Aleksandar Mitrovic chu lakluh tumin an dawr bawk a, mahse, Premier League club hian an striker chhuanvawr hi zawrh lai a nih loh thuin an lo chhang.

Hetihlai hian Liverpool captain Jordan Henderson pawh Steven Gerrard-a enkawl Al-Ettifaq nen sawizawm mek an ni a, Saudi lamin Europe an run mek zel - a la ngaihnawm dawn chauh.

Saudi lamah Savic

Kum 28 mi Milinkovic-Savic-a'n Lazio chhuahsanin Al-Hilal a zawm a, a man hi pound maktaduai 34 niin, kum thum chhung Saudi Pro League-a khel turin contract a ziak - a kum zat ngaihtuahin Saudi lama kal nan chuan a la hma hle.

Mahse, Savic hian sum tamna Saudi sawmna a hnar zo lo. Al-Hilal-ah hian season khat chhungin pound maktaduai 17 bawr vel a hlawh dawn nia sawi a ni a, Lazio-ah khan kum khatah £4.9mtd vel a hlawh niin an sawi - a inthlauhna hi tam tak a ni.

Serbia international Savic hian an ram club Vojvodina aṭanga a professional career zinkawng zawh ṭanin kum khat a khel a, Belgian club Genk tan kum khat a khelh leh hnuah kum 2015 khan Lazio hi a pan.

Lazio tan inelna hrang hrangah match 341 khelhsakin goal 69 a khung a, assist vawi 59 neiin, Coppa Italia (1) leh Supercoppa Italiana (2) a chawipui - Arsenal, Chelsea leh Juventus pawhin an duh nia sawi a ni a, Saudi pan a thlang ta zawk.

Al-Ahli an ṭang

Saudi club Al-Ahli hi an ṭang hle. Saudi club ropui hi Asian Champions Leagues-ah vawi li champion tawhin, Saudi title 18 ngawt an la tawh a, mahse, season hman zawh takah khan pathumna an ni hram.

Tun season-ah intuai thar an tum a, nipui transfer-ah Benfica boss hlui sulhnu nei ṭha tak Jorge Jesus an lalut a, ani nen hian June 2018 - January 2019 kha an lo thawk ho tawh. Jesus hian Benfica tan league nomawi pathum ngawt a chawi tawh bakah Brazil Serie A lamah Flamengo a lo champion pui tawh bawk.

Hei chauh a ni lo. Saudi Public Investment Fund-in an ram club pali a lei zinga mi Al-Hilal hian Wolverhampton Wanderers captain Ruben Neves chu £47mtd-in an lalut tawh a, Chelsea centre back Kalidou Koulibaly chu £17mtd-in an lei bawk a, an che na hle.

Al-Hilal hian hetah hian tawp mai an tum lo a, Fulham striker Aleksandar Mitrovic an dawr tel avangin European football-ah an mit an la len dawn chauh niin a lang.

Hello Mitrovic

Al-Hilal hian Mitrovic hi £25mtd-a lei tumin an dawr a, mahse, London club hian inngaihtuah buai miah loin Saudi club dawrna hi an lo hnar nghal - Mitrovic hralh tumna an nei lo.

Fulham hian kum 28 mi striker hi Newcastle United aṭangin kum 2018 khan £22mtd-in an lei a, Serbia international hian season thum dang khel turin Craven Cottage-ah hian contract a la nei mek bawk.

Season hman zawh takah khan Mitrovic hian Premier League-ah match 24 khelin goal 14 a khung a, season nga leh a chanve khel tawhin, match 205-ah goal 111 a khung a, assist vawi 22 a nei.

Kum 2021-22 season khan Championship match 44-ah goal 43 khungin Championship record a siam a, Premier League a inhlankaipui chiang hle. April thla khan Manchester United nen FA Cup quarterfinal-a an intawn ṭumin referee Chris Kavanagh lakah mawi lo takin a che a, £75,000 chawitir a nih bakah match riat khel thei lo turin hrem a ni.

Hendo an rim

Liverpool captain a ni a, mahse, kum 33 mi Hendo hian a kum a tam ve ṭan tih a hai bik lo - Liverpool-ah kum hnih khel turin contract a la nei mek a, Reds-ah hian kar khatah £190,000 bawr vel a hlawh nia sawi a ni.

Steven Gerrard-a enkawl Al-Ettifaq chuan Hendo hi Liverpool aṭanga thlem chhuah an tum niin an sawi a, kar khata £700,000 hlawhtir an inhuam - Liverpool-a a hlawh tam tham viau mah se, Saudi sawmna hi a tam uchuak a, Hendo tan hnar a harsa mai thei.

Hendo nena khel dun hman Gerrard chuan Liverpool-a amah thlaktu hi Saudi-ah inkhelhtir a tumruh hle niin an sawi a, chutihrual chuan Sadui-ah kal ta se, England tan a inlan lo zui mai ang em, tih zawhna a awm thei.

English midfielder hian Liverpool tan nomawi chawi theih chu chawi kim tawh mah se, England tan international football-ah a la hlawhtling lo a, sum tam tham tak hlawh turin a England career thleng hian a vui liam ngam ang em, tih chu zawhna langsar a ni.