Aston Villa-in Pau Torres an la lut

European football-a club lian tam tak chil tiput ṭhintu Spain centre back Pau Torres chuan a coach hlui Unai Emery hnuaia khelh zel a thlang a, Premier League club Aston Villa a zawm.

Villa hian Villarreal defender lalut tur hian pound maktaduai 31.5 an inseng a, kum nga chhung atan contract a ziak - Villa tan kum 26 mi defender chan theih hi thil lawmawm tawp a tling.

Spain international hian 2020-2023 inkar khan tuna Villa coach Unai Emery enkawlna hnuaiah Villarreal tan a khel a, a pu hlui enkawl club a nih avangin Villa pan hi a hreh lo niin a ngaih theih.

Aston Villa hian season hman zawh takah khan Premier League-ah pasarihna ni chungin season an khar a, season tharah Europa Conference League an khel dawn - Villa tan nomawi beiseina awlsam ber tiin a sawi theih a, champion an tum ang.

Tu nge Torres?

Kum 26 mi defender hi Spain tana vawi 23 ngawt inlan thei a ni a, Villarreal aṭanga inzir chhuak niin, Malaga-ah season khat loan-in a khel tih loh chu club dang tan a la khel ngai lo - Villa-ah chona thar a hmachhawn dawn.

Villarreal hi UEFA Europa League-ah 2020-21 season khan a champion pui a, hetihlaia an coach chu tuna Villa-a a la luttu Unai Emery hi a ni - he season-ah hian Europa League Squad of the Season-ah a tel bawk.

Spanish club Villarreal hi club pangngai tak ni mah se, club lian huanga dah chi an ni lo a, hei vang hian Torres pawh hian Europa League nomawi a chawi tih bak hi a career-ah nomawi liantham chawi a la nei lo.

Torres hian Spain Under-23 team tan Summer Olympics 2020-ah khan football a khel a, mahse, silver medal an hlawh chhuak hram. Spain tan 2020-21 UEFA Nations League final a khel a, hetah pawh hian pahnihnaah lungawi a zir.

Tawnhriat nei ṭha

Torres hian kum 2016 khan Villarreal tana a match hmasa ber a khel a, kum 13 chhunga Villarreal-a piang ngeiin an khaw club tana match a khelh leh hmasak ber a ni - chuti khawp chuan Villarreal lamah chuan a hlu.

Mahse, kum 26 mi defender-in chona thar hmachhawn a duh a, Villa a pan - English football harsatzia a tem dawn a, Spanish defender an fak rawn luai luai hi eng ang taka ṭha nge a lo nih chu kan hre thuai dawn.

Villarreal-in Europa League 2021 final-a Manchester United penalty hmanga an hneh ṭum khan penalty chhuih luttu zingah a tel a, Euro 2020 leh World Cup 2022-ah khan Spain aiawhin a feh chhuak ve ve bawk.

Amah siam liantu Villarreal tan hian inelna hrang hrangah match 173 a khelhsak hman a, goal 12 khungin assist vawi nga a nei. Season hman zawh takah khan Villarreal tan hian match 39 khelin goal khat a khung.

Villa an inthuam ṭha

ECL an khel dawn a, Aston Villa-in tih mai mai a an tum lo. Toress hma hian Leicester City midfielder Youri Tielemans chu free transfer-in an lo la lut tawh bawk a, Belgium international pawh hi European club lian tak takin an lo rim tawh kha a ni a, an chang thei hi an vannei hle.

Championship club aṭangin rawlthar beiseiawm Rico Richards chu free transfer-in an la bawk a, kum 19 mi midfielder erawh a kum a la nau deuh avangin Villa Park-ah hmun chang nghal tura beisei chi a ni lo.

Tunah Europe-a defender langsar pawl ni phak Torres an lalut leh ta a, a man atan £31.5mtd ngawt an insen avangin hmun pawimawh a chang dawn tih a chiang a, hei tak hi Emery tan huaisen ṭulna a ni dawn.

Villa hian tlarhnung laia khel thei Tyrone Mings, Ezri Konsa leh Diego Carlos te an nei sa a, centre back ṭha pangngai tak vek an ni. European football an khelh dawn avangin Villa tan squad chhah a pawimawh a, player tihlungawi vek erawh a harsa dawn tih a chiang - Emery, i hna a inṭan e!