Champion lai Rybakina a tla

Ons Jabeur tan Wimbledon thawnthu a ngaihnawm ṭhin, kum 2021 khan Arab player zinga Wimbledon quarterfinal lut thei hmasa ber a lo ni tawh a, nikum khan Arab nula zinga Grand Slam singles final khel thei hmasa ber a ni hial.

Kuminah pawh a thawnthu hi a la tawp mai lo, tunah chuan champion lai Elena Rybakina chu 6-7(5), 6-4, 6-1 a hnehin Wimbledon semifinal a lut leh ta. Hnehna chang tur hian darkar khat leh minute 53 bak hun a mamawh lo a ni.

Quarterfinal inkhel dangah Aryna Sabalenka pawh a chak. Belarus star hian a khingpui Madison Keys chu 6-2, 6-4 in a hneh a, season hmasa lama indo buaina vanga inlan an phal lohna hmunah hian champion turin match hnih a la hmabak.

Seeded pahnihna Sabalenka hi a champion a nih chuan nomawi a chawi dawn a ni satliah lo, title a lak chuan Iga Swiatek nek chhuakin world number 1 a ni zui thei dawn, a tan chuan thil châkawm bik a ni ngei ang.

Nizan khan Wimbledon hmeichhe semifinal khelh a ni a, seeded pahnihna Sabalenka leh Jabeur te an inhmachhawn a, inkhel dangah Elina Svitolina leh Marketa Vondrousova ten final luh an inchuh thung, result kan hre hman lo.