Man United tan Mount a inlan

Nilaini zan khan Manchester United-in Leeds United nen Ullevaal Stadion, Oslo-ah season thar atana inbuatsaih nan friendly match an khel a, Erik Ten Hag-a hoten hian 2-0 in hnehna an chang. pound maktaduai 55-a Chelsea aṭanga lakluh Mason Mount-a'n inkhel bul a ṭan a, minute 45 chhung a khel a ni.

Dutch manager Ten Hag chuan, "Kan khel a rawn tinung sawt ang. Goal nawr kawnga min pui thei tur player a ni a, chutihrualin goal venhim lam pawh a inhuam. Midfield-ah chuan goal nawr a ṭul rualin goal venhim pawh a ngai. Player theihna nei sang a nih avangin United tan a ṭangkai khawp ang," tiin a sawi.

Man United tan hian Mount bakah Lisandro Martinez, Raphael Varane leh Jadon Sancho te chu senior player zinga bul ṭan an ni a, Varane-a'n captain armband a hreng. Second half-ah Robbie Savage-a fapa kum 20 mi Charlie Savage-a'n captain hna a chelh thung.

Second half-ah hian academy player Noam Emeran leh Joe Hugill ten goal an khung a, academy player dang Kobbie Mainoo leh Hannibal Mejbri te an hmuhnawm viau bawk.