Arsenal tan phuba lak hun a inhawng

Thawhṭanni zanah Anfield-ah Arsenal an mualpho a, 3-1 ngawta an tlawmna khelmualah hian zaninah an lenglut leh dawn - duh thlang thei ni se Gunners hian Liverpool lenchilh nawn hi an thlang kher lo ang. 

League Cup last 16-ah zanin dar 12:15 hian Liverpool leh Arsenal an inkhel dawn a, Gunners tan a êng zawnga thlir chuan zanin hi phuba lakna remchang a ni.

Arsenal hi Premier League a an intawn hnuhnung berah mualpho deuh mah se Community Shield a penalty hmanga Reds hi an hneh tawh avangin an infuih phur ang tih a chiang a, result danglam zawk hawn an beisei ang. 

Premier League club Fulham leh Aston Villa pawh zaninah hian an inlan dawn a, Fulham hian dar 10:00-ah Brentford an lenchilh ang a, Villa hian dar 11:30-ah Stoke City an mikhual dawn thung.

Anfield a an chak loh hlimin Arsenal boss Mikel Arteta-a'n Liverpool nen huang khata dah chi an nih loh thu huaisen takin a sawi a, hmabak thui tak an la neih thu a sawi bawk. 

Mahse, zaninah erawh team pahnih hian Premier League thlir ran chungin khelhna chang tam lo player rual an chhawr a rinawm a, bench lam thlir chuan team pahnih hi an inthlau lo. 

Arteta tan team chhe zawk an nih avanga chhuanlam siam a rem tawh dawn lo a, League Cup aṭanga Liverpool an pet chhuah theih chuan Thawhṭanni zan an mualphona avanga lunghnur fan-te pawhin lawmna tur an nei leh thei tawh ang.

 

Season hmasa League Cup last 16-ah team pahnih hi an lo inhmachhawn tawh a, Arsenal hian 3-1, 4-2 leh 5-4 tein hma hruai hman mah se 5-5 in inkhel a tawp a, penalty hmangin Liverpool hian an pet chhuak zui. 

Liverpool tan midfielder thar Thiago Alcantara a la inlan thei dawn lo a, Bayern Munich aṭanga Anfield pantu hian Covid-19 a kai avangin a inkhunghrang mek. 

Jurgen Klopp-a enkawl team tan midfield-ah James Milner leh Curtis Jones-te ho kan hmuh a beiseiawm a, tlarhnung lam pawp lutuk tur ven nan Virgil van Dijk chuan tlarhnung a rawn ho leh mai thei bawk. 

Tlarhma lamah Mohamed Salah, Roberto Firmino leh Sadio Mane inkawp aiah Takumi Minamino, Divock Origi leh Arsenal laka goal khungtu Diogo Jota-te ho an inkawp a rinawm. 

Chutihrualin Arsenal hian Anfield a an lenluh hmasaka bench lama an dah Nicolas Pépé, Bakayo Saka leh Eddie Nketiah-te bul an ṭantir ngei a rinawm a, player pathum hi Liverpool tana buaina thlen turin an ṭha tawk. 

Anfield a Arsenal mualphona aṭanga lang chiang tak pakhat chu Gunners-in midfielder ṭha pangngai tak an mamawh tih hi a ni a, October 5-ah transfer bazar an khar tawh dawn avangin chet ran a ṭul tawh ang. 

Arsenal hian Lyon midfielder Houssem Aouar leh Atletico Madrid midfielder Thomas Partey an dawr mek a, an pahniha lakluh a theih dawn loh avangin Aouar hi Arteta chuan a duh zawk niin an sawi. 

Gunners hian kum 22 mi midfielder lakluh tum hian pound maktaduai 32-in Lyon an dawr tawh a, mahse French club hian pound maktaduai 54 lo chuan chhuahtir an phal lo nia sawi a ni. 

Zaninah erawh Liverpool-in an neih ṭhat ber an thawhchhuahpui bik dawn loh avangin Arsenal tan insawimawina tur a awm dawn lo a, fan-ten chak result nena an haw an beisei ang.