Sindhu leh Lakshya chak laiin Praneeth chak lo

India badminton player-te chu US Open Super 300 badminton tournament khel turin an zin chhuak a, champion thei tur zinga mi PV Sindhu leh Lakshya Sen te an chak laiin B Sai Praneeth erawh a zinkawng a tawp nghal thung.

Olympic medal vawi hnih la tawh Sindhu hian American player Disha Gupta chu minute 27 chhung lekin 21-15, 21-12 in a hneh a, season bul a ṭan fuh loh tak chu insiamrem theihna remchang a nei thei tura beisei a ni.

Hmeichhe singles match dangah India player, world number 61 Ruthvika Shivani chu Chinese-Taipei player Lin Hsiang Ti lakah 14-21, 11-21 in a chak lo ve thung.

Mipa singles lamah Lakshya Sen pawhin harsatna a tawk lo, darkar chanve pawh tling loah Kalle Koljonen chu 21-8, 21-16 in a hneh a, ani pawh hi Sindhu ang bawkin champion thei tura beisei zinga mi a ni.

Badminton inelna hrang hrang a awm - season khat chhunga an khelh ho BWF Tour hi chi rukah ṭhen hran an ni; World Tour Finals, Super 1000, Super 750, Super 500, leh Super 300 te an ni a, hei bakah hian BWF Tour Super 100 level-ah ranking point a hmuh theih bawk.