Barcelona striker thar Vitor Roque

Spanish champion Barcelona chuan striker thar an nei a, Brazilian club Athletico Paranaense aṭangin kum 18 mi Vitor Roque an la lut. Mahse, Roque hian Barcelona hi a zawm nghal dawn a, kum 2024 aṭangin Catalan club hi a zawm chauh ang.

Barcelona hian Roque man atan engzat chiah nge an insen tarlan ni lo mah se, khawthlang media-te chuan pound maktaduai 25.6-in an indawr fel niin an tarlang a, a khelh ṭhat dan a zirin £26.4mtd pek belh tur a ni dawn thung.

Roque chuan, "Barca ka zawm thei hi ka lawm takzet a, ka tan chuan duhthusam thleng dik a ni," tiin twitter lamah a ziak a, Xavi enkawl Barcelona tana a khel thei tur chu a lawm hle.

Vitor Roque hi Brazilian club tho Cruzeiro aṭanga inzir chhuak a ni a, match 16 a khelha goal ruk a khungsak hnuin, kum 2022 khan Athletico Paranaense hi a zawm - match 67 khelhsak tawhin, goal 22 a khung a, assist vawi kua a nei.

March 25, 2023 khan Brazil tana a match hmasa ber chu Morocco nena friendly match an khelh ṭumin a khel a, kum 18 leh ni 25 mi niin Brazil tana inlan thei naupang ber record a siam.

South American U-20 Championship 2023-ah Brazil a champion pui a, goal ruk ngawt khungin top scorer a ni - season hman zawh takah khan Paranaense chu Copa Libertadores final a thlenpui bawk.

Vitor Roque hian Barcelona-ah hian kum sarih chhung khel turin contract a ziak a, a contract hi kum 2024 aṭanga chhiar ṭan tur niin, Barca aṭanga lei chhuak duh tan euro maktaduai 500 sen a ngaih tur thu an ziak tel a ni.