Leicester-in defender ṭhangduang an lalut dawn

Premier League match thum an khelh tawha hnehna la chang vek Leicester City chuan an squad an thuam chhah chhunzawm zel a, French defender ṭhangduang Wesley Fofana an lalut dawn. 

French club Saint-Etienne chuan an player-in Leicester a pan tur thu hi an puang tawh a, Foxes lam hian official taka puanzarna la nei lo mah se he thuziak i chhiar meuh chuan an in lalut fel tawh hial mai thei. 

Kum 19 mi defender manah hian English club hian pound maktaduai 30 thlenga sang chho thei turin sum an seng dawn a, Saint-Etienne chuan an defender chhuak tur hi, "French player ṭhangduang ber pawl," tiin an fak. 

Leicester manager hlui Claude Puel enkawl Saint-Etienne hian July  2019 khan William Saliba chu Arsenal-ah pound maktaduai 27-in an lo hralh tawh a, Saliba hnua sum tam thama an player hralh leh chu Fofana hi a ni. 

Fofana hian Saint-Etienne tan hian inelna hrang hrangah match 29 a khel tawh a, heng zingah hian tun season a match thum a khelh tawh chu a tel.