Jeje-a pan tur lam a la chiang lo

Mizo striker ngaihven hlawh Jeje Lalpekhlua chuan East Bengal a pan dawn nia sawi thawm awm mah se he thu buatsaih a nih thleng hian thutlukna siam a la awm lo a, 'Mizo Sniper' tia hminglem an pek hian Kolkata club nen an inhnaih tawh tih erawh a pha lo. 

East Bengal hian Indian Super League an khel dawn tih a chian hma aṭang tawh khan Jeje hi an dawr a, mahse Mizo tlangval hian ISL khelh a duh avangin indawrna hi thui tak a kalpui duh lo - tunah erawh Kolkata club-in ISL an khel dawn tih a chiang tawh. 

Jeje chuan, "Inbiakna a kal mek a, official takin ka zawm tur lam hian kan puan vat theih ka beisei. Ka agent ten indawrna hi an kalpui mek a, East Bengal kher ni loin ISL club dang nen pawh kan la inbe reng tho a ni," tiin Vanglaini a hrilh. 

Pune FC aṭanga a professional career ṭantu Jeje hi Indian football-ah chuan a mikhual lo hle. I League vanglaiin Pune FC tana a inlan bakah Pailan Arrows, Dempo leh Mohun Bagan tan a lo khel tawh a, ISL-ah erawh Chennaiyin tan chauh a la khel. 

South Indian club tan ISL-ah match 69 khelin goal 23 a khungsak a, assist vawi sarih a nei bawk - Indian football transfer a ngaihven hlawh pawl a la ni reng hi a mak hran lo. 

East Bengal hi Liverpool legend Robbie Fowler chuan a enkawl dawn nia sawi a awm a, inbiakna kal mek mah se official taka puanzarna erawh a la awm lo thung.