Set hloh hnuah Pliskova a chak

French Open khelh laiah hmeichhe singles player an inkhel tawk thei hle, kal fawr thei an awm meuh lo. Seeded pahnihna Karolina Pliskova chuan set a hloh hmasak hnuah Mayar Sherif chu a hneh hram.

Thawhlehni inkhelah world number 4 Pliskova hian set hmasa berah 'set point' vawi riat ngawt a chhawr ṭangkai thei lo, tie break hmangin world number 172 zawkin set a la. 

Malpui hliam vanga Italian Open khel thei lo Pliskova hi a vanduai dawn niin a lang hman, mahse set thum an khelh zawh meuh chuan 6-7 (9-11), 6-2, 6-4 in hnehna a chang.  Second round-ah Pliskova-i'n 2017 champion Jelena Ostapenko a hmachhawn leh ang.

Inkhel dangah seeded palina Sofia Kenin chuan Ludmilla Samsonova chu 6-4, 3-6, 6-3 in a hneh, pawh a chak. American nula, kum tira Australian Open champion Kenin hian Ana Bogdan a hmachhawn zui ang. Britain nula Heather Watson tan erawh a zin kawng tawpni a ni. Watson hi tualchhung nula Fiona Ferro lakah 7-6 (7-4), 6-4 in a chak lo, inelna hi ni thum chauh khelh la ni mah se British singles player an tla kim der.

Thawhlehni zan inkhel dangah Kristina Mladenovic chu Laura Siegemund lakah 7-5, 6-3 in a chak lo, world number 44 hian a point hmuh tura ngaih vawi hnih chu a hmu lo a, umpire Eva Asderaki thutluknaah a lawm lo. Grand Slam pali zinga pathum Australian Open, Wimbledon leh US Open-ah te chuan khawl hmanga endikna (Hawk-Eye) an hmang a, French Open-ah erawh umpire thutlukna kha ken tlang a ni.