Wimbledon Final ; Ons Jabeur hmaah Marketa Vondrousova

Zanin dar 6:30 hian Wimbledon hmeichhe singles final khelh a ni dawn a, grass court inelna lian berah hian champion thar an awm dawn a ni satliah lo - Grand Slam champion thar an awm dawn.

Dinhmun ṭha lo zawka a din hnuah Ons Jabeur a tho chhuak a, final a lut. Tunisian star hian semifinal lehlama hnehna changtu Marketa Vondrousova a hmachhawn dawn; final khel tur pahnih hi Grand Slam la champion ngai lo an ni.

Jabeur hun a thleng

Ningani zan Centre Court-a inkhelah Jabeur chuan ṭan a hlawh hle a, seeded pahnihna Aryna Sabalenka lakah set khatna hloh hmasa mah se darkar hnih leh minute 19 an inkhelh hnuah 6-7(5), 6-4, 6-3 in a chak zawk.

Tunisian star hian a point hnuhnung ber hmu turin aces a siam a, atan chuan season hmasa lama chetsualna hliahkhuh theihna remchang a ni dawn, nikum final-ah khan Elena Rybakina nen set thum an khelh hnuah a vanduai zawkah a ṭang a ni.

Kum 28 mi Ons Jabeur chuan, "Mipui lam aṭangin khatiang taka thlawpna ṭha kha ka dawn ka beisei ngam lo, an chungah ka lawm takzet. A chak lo zawk chu puanthuah tel nghal mai thei kan ni tih ka hria, chutiang kara ka khelh danah khan ka lawm," a ti.

Set khatna a hloh a ni satliah lo a, a hnuah pawh 2-4 in a hnufual leh hman - game hnih hloh leh ni se la chuan tla thei a ni. Mahse, player puitling leh ṭha a nihna a lantir thei, atan final pawh a huphurhawm hran lo ang.

Final kalkawngah hian nikuma a ngam lo Rybakina a hneh thei a, atan chuan hlauh tur a awm tawh lo. Wimbledon bakah US Open 2020 final-a chak lo zawk a lo ni tawh a, kuminah erawh a vannei zawk nih a beisei sang dawn.

Hmel thar

Kum tam a liam ta, tennis tournament upa berah hian kum 60 chhung chu hmeichhe singles player seeded chang phak loin final an khel ngai lo, tunah chuan he thawnthu hi Marketa Vondrousova-i'n a rawn ti tawp.

World number 42 Vondrou-0sova hian semifinal-ah Elina Svitolina chu 6-3, 6-3 in a hneh; Ukrainian nula hneh tur hian darkar khat leh minute 14 bak hun a mamawh lo, final lut tur hian seeded chang phak player pali ngawt a hneh.

Czech nula Vondrousova chuan, "Season hmasa khan banrek hliam vangin thla ruk chhung ka inkhel thei lo a, tuna Wimbledon final ka thleng ve leh ta mai hi a mak zawk hle. Elina kha player ṭha leh mi bei na thei tak a ni a, ani ka hneh thei hi ka lawm," a ti.

Tun hma chuan Vondrou-sova hian sulhnu ṭha pawh a lo nei ve tawh, kum 2019 khan French Open final a lut a, mahse a vanduai zawkah a ṭang, hliam vanga hun rei tak chhung a chawlh avangin a ranking pawh nasa takin a hniam.

Mahse, player theihna nei sang zinga mi a ni a, a ranking a hniam anga en ngawt chi a ni lo. Inelna sangah tawnhriat a nei - Wimbledon atan bik hmel thar anga sawi theih ni mah se tennis huangah a mikhual lo; Jabeur tan zuam sual theih tur a ni ang.