Mizo tlangval Ruatfela'n gold medal a la

Commonwealth Senior, Junior leh Youth Weightlifting Championship 2023-ah Mizo tlangval Lalruatfela chuan nimin tlai khan gold medal a chawi chhuak.

Inelna hi Gautam Buddha University, Greater Noida-ah neih niin Ruatfela hi 81kg Youth huangah India aiawhin a inlan a, snatch 125kg leh clean & jerk 155 a chawi a, total chu 280kg niin a elpui zingah ani aia chawi rit thei an awm lo a ni.

5th Khelo Youth Games-ah pawh khan Bungzung tlangval Ruatfela hian silver medal a lo chawi chhuak tawh a, tun ṭuma a inlanna category nen hian a inang a ni. North East Games Shillong 2022-ah khan gold medal la in kumin January thlaa neih Sub Junior National-ah khan gold medal bawk a lo la tawh a ni.

Inelna neih hma khan Mizo weightlifting coach Malsawma Khiangte chuan Ruatfela hian gold medal a lak ngei a beisei thu Vanglaini a lo hrilh lawk tawh, a sawi ang ngein a thleng dik.

Jeremy Lalrinnunga pawh lo zirtir ṭhin tawhtu Malsawma Khiangte chuan, "Mizo tlangvalin India ram ai a awh a ni satlih lo a, ram pum a ti hmingṭha thei hi kan lawm hle. Mizoram Weightlifting Association chuan kan chhuang hle a ni," tiin Vanglaini a hrilh.

Kum 2019 khan Lalruatfela hian Mizoram Weightlifting Academy a zawm a, kumin April thla khan National Centre of Excellence (NCOE), Patiala-a training nei turin an rawn thlang, tunah chuan Mizoram chauh ni loin India huap pawhin a ṭha berte zinga mi a ni der tawh.

Commonwealth Weightlifting Cham-pionship rual hian Indian Weightlifting Federation chuan state tin president leh general secretary te a ko khawm a, he hunah hian Mizoram Weightlifting Association president Lallianṭhuama leh general secretary Malsawma Khiangte te an kal a ni.