Pro Division aṭangin Tuipuiral an tla

Mizoram chhunga volleyball inelna sang leh team ṭha awmna Pro Division aṭangin Tuipuiral an tla. Hlimen, Ngopa leh Keiṭumin hmun ruak pakhat inchuhin vawiin hian Tuikual Indoor Stadium, Aizawlah playoff an khel ang.

Mizoram Volleyball Association (MVA) executive committtee chuan Ningani khan, technical committee-in 2022-2023 season chhunga Pro Division club-te dinhmun a theh luh aṭangin thutlukna a siam. Tournament vawi thum awm aṭanga hniam ber Tuipuiral tlain Mizoram volleyball division sang berah Pro Volleyball League champion Thutak Nunpuitu Team, Hunthar, Chhinga Veng, Tuichangral leh Durtlang North an awm zui zel thung.

Kum 2022 nipui lai khan Tuipuiral hi Pro Division-ah a vawi khat nan an tling a, season hawnna tournament leh MVA Cup-ah an che ṭha tawk lo, season kharna leh inelna sang ber Pro Volleyball League-ah semifinal lut pha lo in a hniam pahnih zingah an tel zui leh a ni.

Season tharah Pro Division-ah mipa team paruk an awm leh dawn a, hmun ruak pakhat inchuhin Aizawl district aṭangin Hlimen, Serchhip district aṭangin Keiṭum leh Saitual district aṭangin Ngopa an inel dawn. Vawiin chawhma dar 10:00-ah ṭanin vawi khat ṭheuh an inkhelh kual chhuah hnua a sang ber an tling ang.

Pro Division hmeichhiaah team paruk tho an awm dawn a, season liam taah pasarih awmin Power Department Sporting Club leh Armed Veng South an tla a, Pro Volleyball champion Luangmual, Kanan, Bethlehem Vengthlang, Bungkawn leh Durtlang awm zuiin kar lehah hmun ruak pakhat luah khattu tur tihfel a ni ang.

MVA chuan an hnuaia club hrang hrangin season thar atan player ziah luh hun tur an siam fel bawk. July 22-29 chhungin Pro Division club, district hnuaia club leh Zone hnuaia club-te tan player ziah luh hun an hawng a, player chungchangah harsatna awm thei ven nan Mizoram pumah hun inang an hmang tlang vek a ni.