Clay court-ah pawh Djokovic a thiam

Novak Djokovic chuan French Open nomawi chawi ngei a tumzia a lantir. Serbian star hian Thawhlehni zan khan Mikael Ymer chu straight set a hnehin second round a inhlangkai a, zanin hian Ricardas Berankis nen an inhmachhawn leh ang.

World number 1 hian hnehna chang turin harsatna a tawk lo, darkar khat leh minute 38 chhungin 6-0, 6-2, 6-3 in hnehna a chang. Set khatna bik phei hi chu minute 20 chhung lekin a la, tihsual a ngah hret tih loh chu a inkhelah sawisel tur a tam lo.

Tennis season kal laiah Novak Djokovic aia khel ṭha tluang an awm lo, kuminah chak loh vawi khat chauh a la nei - a chak loh pawh hi US Open aṭanga an hnawl (disqualify) ṭum kha a ni. New York khawpuiah khan chak loa puan ni mah se a tlawm lo tihna a ni.

Flushing Meadows aṭangin nguai takin a haw a, kar hmasa khan Italian Open-ah a inlan. Clay court inelnaah hian nomawi a chawi a, season dang ai mahin French Open atan inbuatsaihna a nei ṭha zawka ngaih a ni hial.

Paris khawpuiah hian a vawi hnih nan champion a tum dawn a, major title lak hnem lamah a chunga awm Rafael Nadal (19 titles) leh Roger Federer (20) te hnaih theih ngei a tum dawn bawk - tunah hian Grand Slam nomawi 17 a kawl khawm mek a ni.

Kum 33 mi Djokovic chuan, "Inkhel turin ka inpeih hle a, ka hun a thlen meuh chuan nuamti takin ka khel ṭhin. Kumin French Open-ah hian ball, clay court awmdan leh khaw vawt ten sawi a hlawh hle, player ṭhenkhat tan chuan harsatna a siam a ni mai thei.

"Heng an sawi hrang hrang hi kei pawhin ka hre ve tho, chutihrualin ka tan chuan inkhelh tinuamtu an ni zawk. Ka khelh duh dan taka khel chhuak tura min puitu a ni zawk, taksa leh rilru pawh tournament khel tur hian a inpeih takzet," a ti.

Serbian tlangval hian khaw vawt leh harsatna dangte chu sawisel a tum ve lo, hun rei tak hnua tennis tournament a hmuna fans lamin an en thei leh ta chu a lawm thu a sawi tel bawk. Final hma chuan Nadal emaw Dominic Thiem emaw a hmachhawn thei dawn lo, a thlen san ngei a rinawm.

Seeded pangana Stefanos Tsitsipas-a'n set hnih a hloh hnuah Jaume Munar 4-6, 2-6, 6-1, 6-4, 6-4 in a hneh hram a, world number 109 Munar hi dinhmun ṭha takah ding hman mah se hun pawimawh laiah a tawnhriat neih tlem a tuar.

Tun hnaiah Greek tlangval Tsitsipas hi a khel ṭha tawk lo, a inkhelh thiamna Hamburg Open final-ah Andrey Rublev a ngam lo. Roland Garros-ah erawh a vawi khat nan set hnih hloh hnuah a tho chhuak thei a, inrintawkna a neih phah ngei ang.

Player langsar dang seeded 13-na Andrey Rublev pawhin fiahna hautak a paltlang. Rublev hian a vawi khat nan French Open main draw a khel a, beisei loh tak maiin American player Sam Querrey chu 6-7 (5-7), 6-7 (4-7), 7-5, 6-4, 6-3 in a hneh.

Thawhlehni zan first round inkhel dangah seeded pasarihna Matteo Berrettini chuan Vasek Pospisil 6-3, 6-1, 6-3 in a hneh. Canadian tlangval Pospisil hi doubles huangah a la inlan dawn a, inelna a thlen san ai chuan an rama haw a chak thu a sawi!

Pospisil chuan, "Doubles lama kan tlak ve leh a rang thei ang berin ka haw ang," a ti. Covid-19 vangin player hi tun hma angin an duh duhna hmuna thlen leh kal darh phal a ni lo a, awmna tur hmun bik an siamsak a ni.

Inkhel dangah Denis Shapo-valov-a'n winners vawi 55 vaw chhuak chungin Gilles Simon chu 6-2, 7-5, 5-7, 6-3 in a hneh a, seeded 10-na Roberto Bautista Agut chuan tual chhung tlangval Richard Gasquet chu 7-6 (7-5), 6-2, 6-1 in a hneh ve bawk.