Havertz tan hun a la ngai - Arteta

Arsenal manager Mikel Arteta chuan a player lei thar Kai Havertz chu rinrawl a ni nghal ngawt dawn lo tih a sawi a, pound maktaduai 65 senga Chelsea aṭanga an lak hian hun a mamawh tih a sawi.

Ningani zan khan Gunners hian season thar inbuatsaihna an match hmasa ber an khel a, friendly match-ah Nuremberg nen 1-1 in an inhnehtawk - North London club tan hian Bukayo Saka chuan goal a khung.

Gunners tan hian Havertz pawh bench aṭangin a lut a, tlarhma lamah nge midfield-ah a chhawr rim zawk dawn tih a la hriat loh. Spanish manager hian player thar a neih avangin an khelh dan phung ṭhenkhat chu a siksawi a rinawm.

Arteta chuan, "Kai Havertz hi engtiang angin nge a insiamrem kan en dawn, inkhel bul ṭan leh a dinhmun tur chu hunin a la hril ang chu. Football hi chuan hun a mamawh deuh, hei chu thil kalphung pangngai a ni," a ti.

Arsenal midfielder pawimawh Granit Xhaka a chhuak fel tawh a, forward leh midfielder atana hman theih Havertz hi ball semtu atana an hmang zawk a nih pawhin a mak hran lo ang.