Quarterfinal-ah Sindhu leh Sen-a

Badminton inelna US Open Super 300 tournament khelh laiah PV Sindhu leh Lakshya Sen te chuan quarterfinal an lut a, anni pahnih hi Indian player zinga medal la phak tura beisei an ni.

Olympic medal vawi hnih la tawh Sindhu hian South Korean nula Sung Shuo Yun chu 21-14, 21-12 in a hneh a, seeded pathumna hian a match lehpekah chuan Gao Fang Jie a hmachhawn leh ang.

Mipa singles lamah Canada Open Super 500 title la hlim Sen-a chuan Czech Republic mi Jan Louda chu 21-8, 23-21 in a hneh, hnehna chang tur hian minute 39 bak hun a mamawh lo a ni.

Sen-a hian kum 19 mi S Sankar Muthusamy a tum leh dawn, Chennai rawlthar Muthusamy hian Misha Zilberman chu 21-18, 21-23, 21-13 in a hneh; 2022 World Junior Championships silver medalist hian beisei a nei sang ve hle.