Wimbledon champion thar Marketa Vondrousova

Rin hlawh lo, beisei ngam loh zinga mi, hming langsar pawh ni phak lo Marketa Vondrousova chu Wimbledon champion a ni ta der mai. Seeded pawh chang phak lo hian Ons Jabeur hnehin nomawi a chawi.

Inrinni tlai Centre Court, All England Club-a inkhelah Czech Republic nula Vondrousova hian Wimbledon 2022 pahnihna Jabeur chu 6-4, 6-4 in a hneh, hnehna chang tur hian darkar hnih leh minute 20 bak a mamawh lo.

Kumin Wimbledon hma chuan Vondrousova hian grass court inelna lian berah hian match khat chiah hnehna a la chang, kuminah erawh beisei phak bakin a khel a, tennis tournament upa berah hial a champion ta a ni.

Champion chu

World number 42 daih a nih avangin atan thil a awlsam lo, a kalkawngah player ṭha tak tak a hmachhawn a ngai. Final inkhel hmuhnawmah pawh hian, set khatnaah 2-4 in a hniam zawkah a ṭang hmasa.

Set hnihnaah pawh thil a danglam tam lo, 1-3 bawkin a hnufual zawkah a ṭang. Mahse, semifinal-a Elina Svitolina a hneh ang bawk khan game hnuhnung lam a la zawn thei hle a, boruak sang leh pawimawh laia point hmu thei a nihna chu a chhawr ṭangkai.

Season hmasa kha chuan Vondrousova hi London khawpuiah khualzin pangngai angin a khal a, kuminah erawh thawnthu a danglam ta hle, a tan chuan mellung pawimawh bik leh theihnghilh ngai tawh loh tur a ni ngei ang.

Kum 24 mi Vondrousova chuan, "Eng nge thil thleng pawh kha ka hrethiam mai lo, lawmna mak leh nasa tak maiin ka khat vek ni berin ka hria, final kha a bul ṭan fuh tawk lo mah ila a hmawr ka bawk fuh hle.

"Nikum lawk kha chuan banrek hliam vangin ka buai a, ka ṭhian ṭha takin qualifier a khel lai chu a hmunah ka en, khualzin mai ka ni. Ka hliam a dam hnua London khawpuia ka kir leh dan hi a mak takzet," tiin a sawi.

Jabeur tan a na

Final khelh hma chuan Jabeur hi champion tura rinkai zawk a ni a, seeded parukna a nih phak avangin tournament khelh hma pawhin champion tura rinkai zinga mi a ni phak - mahse African mi zinga Grand Slam singles title la hmasa ber nih a tumna chu a la hlawhtling thei ta lo.

Kum 28 mi Jabeur hian Garnd Slam final vawi thum a khel tawh a, amaherawhchu a chak lo zawkah a ṭang vek. Wimbledon final khelh zawh hnuah Tunisian nula chuan, "Tennis ka khelh tawhah chuan ka chak loha na ka tih ber a ni.

"A nat chhan chu ka duhna leh beiseina a san vang a ni a, champion thei dinhmuna din hnua vanduai zawk nih leh chu hrehawm tak a ni. Ka tawpna tur erawh a ni dawn lo, tun aia ṭha zawk hian ka lo kir leh ang," a ti.

Final kalkawngah hian player ṭha tak tak a hneh, chung zingah chuan champion lai Elena Rybakina, Bianca Andreescu, Petra Kvitova leh Aryna Sabalenka te hi set thum an khelh hnuah a hneh a, fiahna hrang hrang zingah a pawimawh ber final erawh a paltlang ta lo a ni.