Nunpuia'n Gold a hnek chhuak

5th Junior Boys National Boxing Championship 2023-ah Lunglei rawlthar Lalnunpuia chuan Zirtawpni khan Ladakh boxer ṭha Villayat Ali unanimous decision (5-0) a hnehin Mizoram tan gold medal a hnek chhuak. Inelna hi Arunachal Pradesh khawpui Itanagar-ah neih a ni a, July 9 khan ṭan niin nimin khan a tawp kharna neih a ni.

Nunpuia hi Lunglei SAI aṭanga inzir a ni a, Mizoram team hi coach nei ṭha pahnih Lalngaihawma Ngente (MSSC) leh Rozamliana (SYS) ten an hruai a ni.

Tun ṭum inelnaah hian Mizoramin boxer paruk a tir a, medal pakhat chauh la mah se an lak chhun hi gold medal a ni. Itanagar-a inelna neihah hian Lunglei Venglai rawlthar Nunpuia hian welter weight-ah gold hi a hnek chhuak.

P. Lalchamliana fapa Nunpuia hian quarterfinal-ah Rajasthan boxer Pushpendera Singh chu first round-ah a knockout. Semifinal-ah Services boxer ṭha Prashant chu first round-ah hneh loh viau (5-0) mah se coach tawnhriat nei pahnih Lalngenawma Ngente (MSSC) leh Rozamliana (SYS) te thu ṭha an hrilh a, a lehthal. Nunpuia hian second round-ah 3-2 in a hneh a, third round-ah a hneh leh bawk.

Final-ah hian Nunpuia khingpui hi Ladakh boxer Villayat Ali a ni a, round khatna aṭangin Mizo rawlthar hi a chungnung nghal; 5-1 in an chak. Round hnuhnung pahnihah Nunpuia hi a che ṭha lehzual a, 5-0 ve ve a chak lehin unanimous decision-in hnehna a chang.

Mizoram aṭangin boxer paruk an tel a; Lunglei SAI-a inzir Lalawmpuia (Zemabawk) leh PC Vanlallawmawma (Thenzawl) bakah Lalkhawngaiha (Venghlui) leh L. Joseph. Buihringpachha (Siaha) ten quarterfinal lutin Khelo India India khel tura ngaih an ni.

Mizoram coach Rozamliana (RZ-a) chuan, "Kan naute hi an ṭha vek a, medal la thei vek turin an ṭha. Fixture-ah kan vanduai deuh a, hei hi medal kan hawn tlem chhan a ni. Chutihrualin gold medal kan hawn a, kan lawm hle. Nunpuia hi boxer ṭha tak a ni a, gold lak hi a phu takzet a ni," tiin Vanglaini a hrilh.