Arsenal player man tam ber Declan Rice

Rei tak an indawr hnuah Arsenal chuan Declan Rice an lei fel ta. West Ham United captain hi pound maktaduai 105 man a ni - Gunners player man to ber a nih bakah British player man tam ber a ni chho thei dawn bawk.

Kum 24 mi Rice hian North London club tan season nga daih contract a ziak a, an inrem dan chuan a contract hi season khat atana pawh sei theih tura tih a ni bawk; Rice hian Manchester City forward Jack Grealish (£100m) a khum chho dawn a ni.

Mikel Arteta-a'n nipui bazar a hmang ṭha viau - Zirtawpni khan Ajax aṭangin defender Jurrien Timber (£38.5m) an lakluh thu an puang zo chauh a, a hma deuhin Chelsea aṭangin Kai Havertz (£65m) an lo lei fel tawh bawk.

Rice a fel ta

Indawrna a kal rei hle - an karah Manchester City an rawn tlakzeh avangin Arsenal khan an duh ber Declan Rice an lei thei dawn lo nia ngai an tam hman, mahse Citizens hian pound maktaduai 90 bak an kalpel lo.

Arsenal erawhin an team ti chak thei tur a nihzia an hrechiang a, sum pawh an hmang huai. North London club hian a man pangngaiah pound maktaduai 100 an hmang phawt a, maktaduai nga dang hi chu a pun belh theihna tur a ni thung.

Premier League club ten player an lei tawh zinga man tam ber chu Enzo Fernandez a ni a, Argentina international la turin Benfica hnenah £105.6m lai an hmang - ani erawh British mi a ni lo thung a ni.

British player zingah chuan Jude Bellingham chu player man tam ber ni thei a ni. Borussia Dortmund aṭanga Real Madrid a zawm man kha pound maktaduai 88.5 a ni a, a pun belh theihna zawng zawng nen chuan £115m a tling.

Arteta-a Effect

Rice hian West Ham tan match 245 aṭangin goal 15 a khungsak a, midfielder a nih bakah tlarhnung lam puitu a nih avangin goal leh assist lamah chuan beisei san chi a ni lo, inkhel thunun leh khaikhawm kawngah erawh ani aia ṭha an ta bik lo ang.

Season hmasa khan Hammers chu Europa Conference League-ah a champion pui a, an club tan chuan mellung pawimawh lutuk a ni. Arsenal erawhin nomawi chawi lo mah se Arteta hoin Premier League team hmuhnawm an ni phak.

Rice chuan, "Football-ah hian hun remchang a lo thleng ve ṭhin a, ka tan chuan club lian Arsenal te ang a lo lang a nih dawn hnar a harsa. Hlawhtlinna chan chakin ka tuihal a, he hmunah hian ka hun ṭha leh hlu tak chu ka hman chhuah ka beisei.

"A nihna takah chuan Arteta hi Arsenal ka zawm chhan pakhat a ni, ani hian ka ṭhatna tak min sawr chhuahsak thei ngei ang," a ti a, Spanish manager nena hnathawh dun a chak tawh thu a sawi bawk.

An beisei sang

Arsenal player man to ber ni ṭhin chu Nicolas Pepe a ni - kum 2019 khan Lille aṭangin Gunners hian pound maktaduai 72 zet sengin Pepe hi an lalut a, an beisei erawh a phak lo. Pepe man zat hi Rice chuan a rawn khum chiang hle a ni.

Premier League hrechiang sa a ni a, tualchhung tlangval a nih bawk avangin Rice hi a talbuai lo tura ngaih a ni - atan London khawpui hi thil thar a ni dawn lo, a lakah pawh beisei an nei sang hle.

Arsenal manager Arteta chuan, "Declan hi kum 24 mi chauh la ni mah se Premier Lesgue-ah tawnhriat a nei ṭha tawh hle, team ṭha tak West Ham captain a ni thei tawh a, a team hi a champion pui hial.

"Kan team ti chak theitu tur a ni a, player ṭha leh theihna nei sang bik a nih avangin keini pawh min hlawhtlin pui thei ngei ang," a ti. England international hian training a zawm nghal a, season tharah bul a ṭan nghal thei ang.