Inthlanpui vangin MPL zo hma dawn

Mizoram inthlanpui 2023 Mizoram Legislative Assembly election chu kum tawp hian neih a ni dawn a, football season pawh a nghawng dawn. Mizoram Football Association chuan Mizoram Premier League Season 10 chu August 24, 2023-a ṭan turin ruahmanna a siam a, November thla chanveah zawh a tum ang.

MPL Board chuan MPL10-ah dan siam ṭhat a nei nual a, dan tharte hi a pawimawh hlawm hle.

Club Registration : MPL hmasa pakuaah kha chuan inelna hmachhawn tur club-te tan Firms & Society Registration tih kher a ṭul a a, tunah erawh a ngai dawn tawh lo. MPL club thar tan khelmual pawn lama buaina a tlem phah sawt ang.

U18 aiah U17: MPL khelh rualin MPL kum bithliah inelna neih a ni tawh. Chutihrualin Under 18 ni loin Under 17 a ni tawh dawn a, MPL ṭantirh hmasa pahnihah pawh khan kum bithliah inelna hi Under 17 a ni.

MPL match-ah Under 18 player pakhat awm ngei ngei ngai pawh tihtawp a ni. MPL club tinten player 30 aia tam lo CRS hmangin an ziaklut thei a, heng bakah hian Under 17 player 30 aia tam lo an ziaklut thei bawk.

Under 17-a khel thei chinte hi January 1, 2007 emaw a hnu lama piang chin a ni.

Digital Birth Certificate: India ramah kum dik loa football khel an ṭhahnem a, Mizoram pawh an him bik lo. MFA chuan kum dik taka football khelh theih nan hma a la chhunzawm zel.

MPL10 aṭangin Under 17 khel turte chuan Digital Birth Certificate an nei ngei tur a ni a, inkhelh hunah physical checking neih ṭhin a ni bawk ang.

C Licence chin chauh: Mizo zingah license coach an ṭhahnem zel a, MPL ṭantirhah coach an tam loh avangin D Licence chinin MPL an enkawl thei. Tunah erawh Head Coach atan AIFF/AFC C-Certificate holder chin chauh hman phal a ni tawh dawn.

Association of Mizoram Football Licensed Coaches (AMFLC)-ah pawh licence coach 140 an inziaklut tawh a, inziaklut lo an awm nual bawk. AMFLC data aṭanga a lan danin A License hi Mizo pahnih an awm a, B License 12 leh C License 30 an awm. MPL club pariatten coach 44 vel aṭangin duh thlan tur an nei dawn tihna a ni.

Foreign player awm lohna: MPL9-ah club inthurualin foreigner chhawr lo turin inremna an ziak a, tun season-ah pawh AIFF-in State League-a foreigner chhawr a rem tih loh avangin dan angin foreign player chhawr theih a ni dawn lo.

Chutihrualin state pawn player erawh lak theih a ni dawn. Inter-state player panga aia tam lo chhawr phal a ni a, playing XI ah pahnih aia tam an khelh phal a ni lo ang.

CRS leh CMS: Player chauh ni loin team official te CRS leh CMS hmangin Club te hmangin register tawh tur a ni a, uluk zawka endik ṭhin a ni ang.

NIVIA Dominator 3.0 : MPL-ah hun rei tak chhung Nivia Shining Star hman a ni a, MPL9-ah Nivia Dominator 3.0 hman a ni. MPL10-ah pawh Nivia Dominator 3.0 hi man chhunzawm a ni ang.

I Day Football: Football season ṭan nana hman I Day Football chu tun thla tawp aṭangin khelh ṭan a ni dawn. MPL club ten I Day Football-ah pawh hian CRS hmanga registered player te chauh an khelh tir tur a ni ang a, U-17/18 an tel kher a ngai lo ang. CMS hman a ni dawn lo. I-day Tournament-ah hian MPL club te inelna bik atan Dominator 3.0 ball hman a ni ang.