Wimbledon champion Carlos Alcaraz; Novak Djokovic-a lal ram a ṭhiahsak

Tennis khawvel chuan 'Carlos Alcaraz' tih hming hi a hre reng tawh ang, a chanchin hi kan la sawi zui dawn chauh ni pawhin a lang. Spanish tlangval hian Novak Djokovic chu a lal lenna hmunah hnehin Wimbledon title a la.

Pathianni zan Wimbledon final tir lamah Alcaraz hian tawnhriat a neih loh a tuar, mahse a hnu lamah erawh tunlaia player ṭha ber a nihna lantirin 1-6, 7-6(6), 6-1, 3-6, 6-4 in a chak, darkar li leh minute 43 lai an inkhel a ni.

Kum 20 mi Alcaraz tan Wimbledon title hmasa ber a ni a, a zawna vawi li champion thei Djokovic erawhin grass court inelna lian beraa vawi sarih a champion tawhna a belh thei ta rih lo, vawi riat champion tawh Roger Federer a la chungnung zel.

Final hmuhnawm chu

Tennis ngainatuten Centre Court, All England Club lam an hawi ṭhup a, a hmuna entu zingah Prince leh Princess of Wales, lemchan thiam Brad Pitt, Daniel Craig leh Wimbledon vawi hnih champion tawh, 'Sir' nihna an pek Andy Murray pawh an tel.

Inkhel ṭan hmain Grand Slam vawi 23 champion tawh Djokovic chuan final khel tur player pahnih chu hlawhtlinna chan chaka rilṭam ve ve an nih thu a sawi, tunlai player ṭha pahnih an nih bawk avangin an inkhel kha a hmuhnawm dawn tih a chiang sa.

Ball an vaw ṭan ta ngei a, service hmasa zawk Djokovic chu chesual thei dinhmunah a ding - Alcaraz zawkin break point a hmu nghal. Mahse, Serbian star hian a service a hloh lo mai a ni lo, set khatnaah game khat chiah a hloh ta zawk!

Djokovic-a'n a tawnhriat neih a chhawr ṭangkai, dawhthei takin ball a vaw let rei peih a, point khat harsat zia hriain a khingpui chu insum zo lo tura siam a tum tih pawh a lang; kum 36 mi a ni tawh chungin inkhelh rei a la huam hle.

Hei le Alcaraz

Set hmasa ber chiang taka a hloh avangin Alcaraz chu a thawh chhuah leh loh mai a rinawm zawk - a khingpui kha French Open semifinal an khelh ṭuma a ngam loh kha a ni a, atan inkhel boruak thlak a harsa tura ngaih a ni.

Mahse, tie break an khelh hnuah set hnihna a la! Set la tur hian Djokovic-a service chu ṭha zetin a vuak letsak a, champion laiin a lo la let hman lo. Set thumna pawh Spanish player zawkin hneh takin a thunun chhunzawm.

Set linaah erawh Djokovic-a'n a khingpui service vawi hnih a chhuhsak a, a tawpah Alcaraz-a'n service hmanga double fault neiin set a hloh zui, tawnhriat ngah Serbian star danglamna leh ṭhatna kan hmu.

A naupang zawk Alcaraz a tlan tam a, kil leh sir tak taka ball kal pawh a la hman zel. Net bula tlan hma kawngah a player ngaihsan Rafael Nadal aiin a ṭha zawk emawni tih mai tur a ni a, set hnuhnung berah boruak sang viau mah se a dingnghet tlang ta zawk.

A hming chu Carlos Alcaraz

Tennis khel thiam leh ropui bik an awm a, an hun tawn a inrual avangin 'Big Four' tiin an sawi ṭhin. Roger Federer, Rafael Nadal, Novak Djokovic leh Andy Murray te an sawina a ni a, anni pali hian Wimbledon khelh hnuhnung 19-ah title chu an inchan sem vek!

Player dang tan Wimbledon title hi lak ve theih loh ang mai a ni a, champion chu thil harsa tak a ni. Tunah zet chuan midang tana thil harsa taka ngaih kha Carlos Alcaraz chuan a rawn hlen chhuak ta a ni.

Djokovic chuan, "Ani ang hi ka la hmachhawn ngai lo. A nihna tak sawi chuan Roger leh Rafa ten ṭhatna bik an ni a, zep loh chuan ṭhat tawk lohna lai pawh an nei. Carlos erawh engkimah a ṭha famkim," tiin a sawi a, a thusawi hian Alcaraz khelh dan a sawifiah hle.

Player ṭha leh theihna nei sang bik a ni tih chu inhrilh nawn a ngai tawh lo, chutihrualin player ropui bikte huanga lut ve tur erawh chuan hmabak tam tak a la nei, a kum rualpuiah player chhuak thar ṭha tak tak an tam avangin kawng awlsam a ni dawn lo.