Hello Miami; Football lalpa Messi a lokal e!

Miami khawpuiah ruahpui vanawn surin, khawpui ri rum rum mah se DRV PNK Stadium-a Lionel Messi hmu turin mipui a dang zo lo - "Mei leh tui lianin min hual vel, mahse min dal zo lo" tih ang deuh a ni.

Mipui 18,000 lenna DRV PNK Stadium hi Major League Soccer-ah chuan San Jose Earthquakes khelmual PayPal Park nen mipui len tlemna ber a ni a, mahse, Inter Miami hian fans 20,000 tel len tir tumin stadium hi an tihzauh belh.

Heti zata fans kal thei zat an tipung chung leh, nasa taka ruah a sur chungin stadium-a leng lo fans an pungkhawm a, fans tam tak chuan Messi hmuh theih mial beiseiin programme tawp thlengin pawnah an nghak!

Nimin zinga Messi tlangzarh inkhawmah hian, Barcelona tana a khelhpui ṭhin, defensive midfielder Sergio Busquets pawh tlangzarh nghal a ni a, Inter Miami hi MLS club ngaihven hlawh ber an ni nghal.

America number 10

Ballon d'Or pasarih zet kawltu a ni a, football ngainat lohna hmun America meuhin nghakhlel taka Messi an lo hmuak hi a awm lo hran lo - an tan chuan hei hi duhthusam a tak ram chang chu a ni a, hei aia beisei san theih zawk an nei chuang lo.

Messi-a'n khelmual a luh laia mipui thawm chu ring tak a ni a, a puizia thua sawifiah chi a ni lo. Au rinna aṭangin aw a lo chhuak a, "America number 10, khawvela number 10 ṭha ber chu," tiin an puang dum dum a, USA-a number 10 ha ve dang zawng an nghilh a, 'America number 10' nihna chu Messi-a chanvo a ni.

Inter Miami fan-te lawmna tizual turin Sergio Busquets pawh mipui hmaah tlangzarh a ni a, kum 35 mi ni tawh mah se season hman zawh tak La Liga-a Barcelona champion nana tha thawhhlawk tak a la nih avangin Busquets lakluh theih hi Miami tan a hlu.

MLS club hi Barca tana Messi khelhpui ṭhin Jordi Alba nen pawh sawizawm an ni a, Catalan club-a 'hero' ṭhin pathum kha Miami hian suihzawm leh ngei tumin hma an la mek zel e.

A la ngai reng

Messi chuan a kum tam ve deuh tawh mah se, hman ang thoa hlawhtlin duhna thinlung a la neih reng thu a sawi a, Inter Miami fan-te tan chuan Argentina captain thusawi hi ngaihnawm a tling ang.

Kum 36 mi Messi chuan, "Inelna hmachhawn tura training neih ka châk tawh takzet a ni. Hman ang tho khan hlawhtlin duhin ka la tuihal reng a, inelna hmachhawn a, hnehna chan a, he club ṭhan zel theih nana puih hi ka duh a ni," a ti.

Messi chuan sawi zawmin, "Ka chhungte nen he khawpui pan a, he hmuna inkhel tur leh inhmachhawp te um zui tura duhthlanna ka siam thei hi ka lawm takzet. Nuam ti takin kan awm ang tih pawh ka ring tlat.

"Hun hlimawm tak kan hman ka beisei a, thil ṭha tak a lo la thleng dawn chauh a ni," a ti a, USA-ah chawlh hmang mai mai turin a kal lo - hlawhtlin a la duh reng. Messi hi Super Bowl vawi sarih chawi tawh Tom Brady leh NBA vawi li champion tawh Stephen Curry te chuan video kaltlangin an lo lawm ve bawk.

Hriatreng tlak

Messi an lalut meuh chu Inter Miami chauh an lawm lo a, an league khelhna Major League Soccer pawh an lawm hle - MLS commisssioner Don Garber chuan Messi ang player ropui an lalut chu an league tan danglamna thlentu a nih thu a sawi.

Garber chuan, "Messi-te ang player-in kan league-a khelh an thlang hi kan tan chuan inthlakdanglamna lian tak a ni a, he thawnthu hian khawvel hmaah football ram zinga tel kan ni tih a pholan ka beisei," a ti.

MLS hotupa chuan sawi zawmin, "MLS hi khawvela league ngaihven hlawh pawl ni turin kum rei tak chhung kan bei tawh a, zanin hi kan tan chuan zan danglam bik a ni," a ti a, a hlim takzet.

US top flight league hian khawvela player langsar tak tak an lo la lut fo tawh ṭhin a, Messi meuh an lalut chu a dan a danglam a, an phur tlang takzet - tuin nge maw dem thei ang le?

Beiseina - a tak ram

Inter Miami neitu zingah David Beckham a tel a, Beckham hian kum 2007 khan Los Angeles Galaxy chu zawmin, khawvel hriatah MLS chu a lo pholang tawh - hetihlaia Beckham-a'n MLS a tihlar dan hi a hranpaa ziah tham fe a awm.

Kum 2023 a herchhuah meuh chuan MLS club neitu zingah Beckham a tel tawh a, player a nih laia MLS a pan vanga khawvel nghawrnghingtu khan inkhelh a chawlhsan hnuah pawh a player lakluh hmangin MLS a vawrh lar leh ta.

Beckham chuan, "Kan tan chuan duhthusam thleng dik a ni," a ti a, England captain hlui chuan sawi zawmin, "Leo, i career-a i kal zelna turah kan club i thlan avangin lawmthu kan sawi e," a ti.

Inter Miami neitu zinga mi, American sumdawng hausa tawntaw Jorge Mas chuan, "Football boot bun tawh zawng zawnga player ṭha ber a ni," tiin Messi chungchang a sawi a, an phur vanglai tak a ni.

A chhehvel

June thla khan Saudi Arabian club Al-Hilal chuan Messi hi an hnena khel turin an sawm a, mahse, Argentine forward hian kum thum chhunga dollar tluklehdingawn 1.5 hlawh tura sawmna a hmuh chu a hnar - a tlangnel sana Miami tana khelh a duh.

Messi-a'n a duh ang ngeiin Miami club a pan ta a, a inkhelh hun tur mipuiin an nghakhlel hle - Messi hian July 21-ah Miami tana a match hmasa ber a khelh beisei a ni a, Leagues Cup-ah Mexican club Cruz Azul nen an inkhel dawn.

Inter Miami hian Messi nuam tih dan tur ang berin hma an la em ni chu aw, tih mai tur a ni a, Barca tana a khelhpui ṭhinte an sawm luh bakah Barcelona leh Argentina thlenga a lo hrawn tawh coach Gerardo Martino thlengin an thlem lut.

Martino enkawlna hnuaiah Messi a khel leh dawn a, Argentine coach nen an inhrawn hmasakah nomawi chawi dun nei lo mah se, Inter Miami-ah erawh hlawhtlin ngei an tum dawn - Miami club tan hlawhtlinna chhar turin Paris St-Germain forward hlui Messi thiamna chauh pawh hi a tawk êm êm ang.