Duhthusam thleng dik chu!

Carlos Alcaraz hi kum 20 mi chauh a la ni a, nikum khan world number 1 ni thei naupang ber dinhmun a lo luah tawh. Tunah chuan Open Era chinah Boris Becker (kum 17) leh Bjorn Borg (20) te hnua Wimbledon champion leh thei naupang ber a ni hial.

Wimbledon champion a nih hnuah Alcaraz chuan, "He zet chu ka duhthusam thleng dik a ni, tunah chuan grass court pawh ka ngaina in inkhelh a nuam ka ti ta hle. Final hma khan ka sawi lawk tawh a, chak lo pawh ni ila ka thlen chin hi a sang ka ti hle.

"Final khelh mai bakah champion nih chu a ropui ka ti hle, tennis player ropui berte zinga mi ngei mai hneh chunga ka champion theih avangin ka khelh danah ka lungawiin ka lawm takzet," a ti.

Spanish mi a ni a, an ramah chuan tennis hi clay court-ah an khel ṭhin. Chuvangin Spanish player dangte ang bawkin clay-ah a inkhel nasa a, nuam a tihna hmuh pawh a ni. Mahse, French Open hmain US Open leh Wimbledon champion a ni ta zawk.

Tun season hma chuan Alcaraz hian grass court-ah professional match vawi li chauh a la khel. Kuminah erawh Queen's Culb Tennis Tournament khelin a champion a, inbuatsaihna a neih ṭhat ang bawkin Wimbledon-ah pawh a hlawhtling.

Alcaraz chuan, "Grass-ah hian tournament hi vawi li bak ka la khel ngai lo. Queen's Club-ah ka champion a, hun rei lote chhunga hetiang hlawhtlinna lian zawk ka chang leh thei mai hi mak pawh ka ti hle.

"Wimbledon champion zet chu ka hun hman tawha ka hlim ber ṭum a ni hial. Ka hun tawh hi damchhunga ka theihnghilh tawh loh tur a ni. Player ṭha tak Novak ka hneh thei a nih chuan, ka rualpui dangte pawhin player ropui hneh turin theihna an nei a ni tih kan hriat ka ring," a ti.

Kum 20 mi lek ni chungin US Open leh Wimbledon title a la ta a, tun season kal laiah match 47 zet a chak tling ta bawk. Open Era (kum 1968) chinah chuan kum 21 tlin hmaa major title pakhat aia tam la thei player pangana a ni nghal bawk.

Alcaraz dahsangtu Djokovic

Novak Djokovic hian Roger Federer leh Rafael Nadal te aiin Grand Slam nomawi a ngah tawh zawk - French Open champion a nih chiah khan major title 23 a nei tling a, record inṭawm a chelhpui Nadal a kalsan.

A elpui player ropui pahnih kalsan hlat theihna remchang nei mah se a kawngah Carlos Alcaraz a lo ding a, ani hian Novak tan kawng a ti harsa chho zel dawn ni pawhin a lang - tun season atan US Open an la hmabak.

Serbian star Djokovic chuan, "Tun hma deuh kha chuan Carlos hi clay court atana elpui hautak tur chauh a ni emaw ka ti hman a, mahse a ni lo tih ka hrechiang tawh. Hard court-ah a champion a, tunah grass court-ah a hlawhtling leh ta," a ti.

Wimbledon final khelhna hmun, grass court inelna pui ber a khelhna hmunpui ber ni bawk Centre Court hi Djokovic tan chuan hmun ṭha a ni, kum 2013 aṭang khan hneh loh a la tawng lo.

Tun ṭumah pawh hi dinhmun ṭha taka din theihna remchang a nei, set khatna a lak hnu khan set hnihnaah khan point khat hmuh belh zeuh ni se la chuan set la leh mai thei dinhmunah a ding, mahse tie break-ah a vanduai ta zawk.

Kum 36 mi Djokovic chuan, "Hun remchang ṭha ka neih laia ka chhawr ṭangkai thei lo kha a pawi ta a ni, set hnihna tie break kha ṭha zawka khel thei tur chu ka niin ka hria.

"Chutihrualin Carlos khan min bei let na thei em em a, a bik takin mahni a inveng thiam hle. Ball a vaw nain a tlan hman zel bawk a, tum ṭum final kan khelhah chuan hnial rual lohin hnehna chan phu zawk a ni," tiin a sawi.

Alcaraz ṭha a tihzia sawi zuiin Djokovic chuan, "Tun hnaiah miten Carlos Alcaraz hian Roger, Rafa leh keima hnen aṭangin a ṭha lai lai a la khawm tia an sawi ka hria, hei hi kei pawhin ka pawmpui e, a ṭha lai zel a la khawm.

"Kum 20 mi chauh ni chungin a puitling tawh em em a, Spanish mi a nih ang ngeiin a rilru a paukhauh takzet a, a pawimawh lai takah Rafa angin amah a inveng thiam em em bawk a ni," tiin a sawi a, player chhuak thar lakah beisei a nei sang hle.

World number 2 Djokovic hi tun ṭumah chak lo mah se a beidawng mai dawn lo, tun hma pawhin hun harsa a lo paltlang fo tawh; huaisen takin a lo kir leh ngai ang tih a chiang, hei tak hi September thlaa khelh tur US Open ti nghahhlehawmtu a ni.