Concacaf Gold Cup-ah Mexico an champion

Mexico chuan nimin zing khan Panama 1-0 in an hneh a, Concacaf Gold Cup-ah an champion. SoFi Stadium, Inglewood (California)-ah entu 70,000 chuang hret lengin an khat vek a, goal awmchhun hi Santiago Gimenez-a'n minute hnih chauh a awm tawh tihin a khung.

Gold Cup-ah Mexico hi champion ngun ber an ni a, vawi kua an champion. Confederation of North, Central America and Caribbean Association Football (CONCACAF) hnuaia inelnaah hian Brazil, Colombia, Peru, South Korea, Ecuador leh South Africa te pawh sawm an nih angin an tel tawh a, an la champion lo. Tun ṭumah hian Qatar sawm an ni a, quarterfinal-ah pahnihna Panama hi 4-0 in an hneh lo a ni.

Inkhel a nung ṭha

Ṭan phat aṭangin mipui thawm a ring a, semifinal-a United States hnehtu Panama zawkin chance ṭha an nei hmasa. Panama forward Ismael Díaz chuan keeper chauh a hmachhawn hnuah ball a khak sual palh a, hun ṭha a bawhpelh.

Inkhel a nung a, Panama leh Mexico ten chance an inneih chhawk. Minute 33-naah Luis Romo ball thawn luh chu Henry Martín-a'n goal-ah chantir mah se thil thlen dan an en let a, offside vangin pawm a ni lo.

Mual dinglamah Romo a hlauhawm chhunzawm a, Mexico winger cross chu Orbelín Pineda-a'n goal-ah pet mah se Panama keeper Orlando Mosquera-a'n a dang.

First half-ah goal a lut lo a, inkhel erawh a hmuhnawm. Second half-ah pawh goal hmuh tur a awm lawk lo a, inkhel erawh a nung zel. Goal chance erawh a tam lo deuh.

Minute 88-naah Mexico-in an vaw let a, Santiago Giménez a rawn inlar. Kum 22 mi Feyenoord striker hi bench aṭanga rawn lut a ni a, khelmualah erawh a tlangnel. Amah vengtu defender Harold Cummings chiang taka a bum hnuah a khalh lut a, goal ṭha bik a khung. Mexico champion-na goal a ni zui a, mipui thawm a ring hle.

Tu nge Gimenez?

Gimenez hi Argentina khawpui Buenos Aires a piang a ni a, Mexico international hlui Christian Gimenez fapa a ni. Christian hi Independiente aṭangin Mexico club Veracruz-ah kum 2004 khan a insawn a, an chhungkuain Mexico-ah an pem.

Mexico-a an pem hian Gimenez hi kum thum mi chauh a ni a, Mexican club ṭha Cruz Azul aṭanga inzir chhoin kum 2017 aṭang khan senior team tan a khel pha. Nikum July thla khan Feyenoord a zawm a, Dutch club tan hian season hmasa berah league match 32 khelin goal 15 a khung.

Mexico tan Gimenez hian match 18 a khel tawh a, goal li khung tawhin a goal khung tawh zingah final-a Panama laka a khung chu a pawimawh lawrlak. Mexico champion-na goal vang hian khawvel pawhin Gimenez theihna an hriat phah ang.