Chelsea-in Fulham dawrna an hnar

Premier League club insiamrem mek Chelsea chuan Callum Hudson-Odoi chu chhuahtir phal mah se, Fulham dawrna an hnar a, an dawrna zat hi tarlan ni chiah lo mah se Fulham lam hian sum an hum hnem tawk loh vang niin a lang.

Kum 22 mi Hudson-Odoi hian Stamford Bridge-ah kum khat dang cham turin contract a la nei a, mahse, amah ber hian chhuah a duh avangin Fulham bakah Nottingham Forest leh AC Milan nen sawizawm a ni.

Fulham hian Tottenham Hotspur lakah Manor Solomon chânin, Neeskens Kebano chuan a contract a hmang zo bawk a, hei vang hian mual sir aṭanga goal nawr thei tur player an zawng mek.

London club hian an neih sa Willian chu contract thar ziak turin an dawr mek a, Hudson-Odoi lakluh ngei an tum bawk - sum tam zawk nena an kal nawn a nih chuan an hlawhtlin mai a rinawm.

Hudson-Odoi hi Chelsea academy aṭanga inzir chhuakin, hmabak a nei êng viau. Mahse, Champions League, Europa League, UEFA Super Cup leh FIFA Club World Cup champion team zinga tel winger hian Blues-ah hmun a chang phak meuh lo a, season hmasa kha Bayer Leverkusen-ah loan-in a khel.

Leverkusen tan hian match 21-ah goal khat chiah khungin, beisei a phak lo a, Hudson-Odoi hian Chelsea-a cham a, khelh phak loh ai chuan, a khelh phakna tur club zawm a duh.