Chelsea-in Angelo Gabriel an lalut

Chelsea chuan Santos aṭangin Angelo Gabriel an lalut a, kum 18 mi Brazilian winger man hi official-in puanzar ni lo mah se euro maktaduai 15 bawr vel ni tura ngaih a ni.

October 2020 khan Angelo hi kum 15 leh ni 308 mi lek niin Maracana Stadium-a Santos leh Fluminense inkhelh ṭumin a inlan a, Brazilian top flight-a player inlan naupang ber a ni.

Ke vei lama pet Angelo hi Copa Libertadores-a goal khung naupang ber a ni a, April 2021 khan kum 16 mi lek niin goal a khung. Kum 18 mi chauh a la ni nachungin Santos tan match 129 a khel tawh a, goal nga a khungsak.

Angelo hi Brazil tan Under 15, U17 leh U20-ah te a khel tawh a, senior team-ah erawh koh a la ni lo. Chelsea-in tun nipuia player pathum an lakluhna a ni a, Brazilian winger hma hian France forward Christopher Nkunku leh Senegal striker Nicolas Jackson te an lalut tawh a ni.

Nikum transfer bazar-ah Chelsea hian uchuak taka player an lakluh avangin inṭhuah thawl an mamawh a, tawnhriat nei player Mateo Kovacic, Kai Havertz, Mason Mount, Edouard Mendy, Kalidou Koulibaly, N'Golo Kante, Ruben Loftus-Cheek, Christian Pulisic,Tiemoue Bakayoko leh Cesar Azpilicueta te an chhuak tawh a ni.