Xavi Simons-a'n PSG a zawm

Paris St-Germain midfielder hlui Xavi Simons chu a club hluiah bawk a kir dawn a, he thuziak i chhiar meuh chuan PSV Eindhoven player Simons hi PSG player a ni fel leh der tawh hial ang.

Netherlands tana vawi nga inlan tawh Xavi hi Barcelona leh PSG academy-ah te inzir ṭhin a ni a, PSG senior team tan match 11 khela goal a khung loh hnuah season hmasa ṭan dawn khan PSV a zawm.

PSG leh PSV inremna hi a danglam ang reng a, Simons hian kum nga chhung atan Dutch team-ah contract ziak mah se, PSG hian an duh a nih chuan pound maktaduai ngaa an lei let theih thu a inziak tel.

Season hman zawh takah PSV tan inelna hrang hrangah match 48 khelin goal 22 a khung a, assist vawi 12 a nei. PSG hi an rinlawk ang ngeiin an inchhir a, £5mtd-in Simons hi an lei let a ni.

PSG hian tun nipui transfer-ah inthuam chak hna an thawk mek a, Xavi hma hian Lucas Hernandez chu Bayern Munich aṭanga lalutin, Marco Asensio leh Milan Skriniar chu free transfer-in an la bawk a, Manuel Ugarte (Sporting Lisbon) leh Lee Kang-in (Real Mallorca) an la bawk.