Man United-in Maguire captain nihna an hlihsak

England international defender Harry Maguire chuan manager Erik ten Hag-a'n a captain nihna a hlihsak thu a sawi. Maguire hi January 2020 khan Ole Gunnar Solskjaer-a'n captain atan a ruat a, Leicester City aṭanga pound maktaduai 80-a Old Trafford a zawm aṭanga thla ngana lekah a Captain nghal!

Kum 30 mi Maguire chuan, "Manager nen kan inbiak hnuah captain a thlak tur thu min hrilh a, a chhan pawh a sawi bawk. Mimal tak chuan ka lungawi lo. Chutihrualin United kawr ka hak apiangin theihtawp ka chhuah zui ang," tiin a lawm loh thu a sawi.

Maguire chuan sawi chhunzawmin, "Club ṭantute chungah thinlung takin lawmthu ka sawi a, captain hna ka chelh chhunga min ṭawiawmnaah ka lawm hle. Man United captain ka ni thei hi ka hun tawna ka dahsan ber zinga mi a ni a, hetiang dinhmun min chelhtirtu Ole Gunnar Solskjaer chungah ka lawm takzet a ni," tiin a sawi.

Ten Hag hnuaiah Maguire-a'n hmun pawimawh a chang pha lo a, amah aiin Raphael Varane leh Lisandro Martinez te a ring zawk. Player pakhat zawk an inhliam a nih pawhin Sweden captain Victor Lindelof chu thachangdawltu atana hman a ni a, Luke Shaw pawhin centre back hna a chelh ṭhin bawk.

Maguire-a'n ngawih chuh loa a lungawi loh thu a sawichhuah avangin Old Trafford-a a cham reng hi a rinawm loh zawk a, England tana khel zel turin a khelh phakna club zawm a mamawh bawk.

Old Trafford-ah Maguire hi a hlim niin an sawi a, a lungawi chiah em, tih chu fiah a ni chho mek. Manchester United-in pre-season tour an neih hunah an hruai tel ang em, tih chu zawhna a ni a, a chhanna a awm thuai dawn.

Manchester United hian captain thar hi New York an thlen hma chuan an puan mai a rinawm lo a, Ningani zingah New York hi an thleng dawn. Friendly match hmasa berah Varane-a'n Captain hna a chelh a, chutihrualin Bruno Fernandes chu Captain nghet ni tura ngaih a ni.