Onana-a'n Old Trafford a pan dawn ta

Nimin khan Man-chester United leh Inter Milan te chu goalkeeper Andre Onana chungchangah inremna an nei niin The Athletic chuan an ziak. Kum 27 mi Onana manah hian English club hian euro maktaduai 51 (£43.9m) an sen a ṭul dawn a, a chet ṭhat dan a zirin euro maktaduai li an pe belh leh thei bawk.

Cameroonian keeper Onana hian medical a la nei lo a, a neihna tur hmunah thutlukna siam a la ni lo. Onana hian medical test nei turin Manchester a pan thei a, chutihrualin United States-a club pre-season tour a pan vat theih nan hmun dangah a tithei bawk.

Vawiin hian Erik Ten Hag leh a hote hian Scotland an pan dawn a, Edinburgh-ah Lyon nen friendly match an khel dawn. Hemi zawh hian United States lam an pan ang. Club pahnih inremnaah hian buaipui tur an la neih avangin he thu i chhiar pawh hian Onana hi an la tlangzarh kher lo ang.

Chutihrualin Onana leh Man United te hian mimal inremna an tifel tawh a, contract erawh la ziak lo mah se kum 2028 thleng bakah kum khat pawhsei thei turin a ziak dawn. The Athletic-in a tarlan danin mimal chungchanga inremna hi Inrinni khan an nei a, club pahnih hian Thawhṭanni zan khan inremna an nei leh bawk.

Man United hian Onana hma hian Mason Mount an lalut tawh a, Chelsea aṭanga an lakluh English midfielder hi friendly match hmasa bera Leeds United an hmachhawn ṭum pawhin a inlan tawh. Onana an lakluh fel chuan Ten Hag-a leh a hoten striker an melh a rinawm a, Atalanta forward Rasmus Hojlund nen sawizawm a ni. Chutihrualin Man United hian financial fair play vangin nipui transfer-ah uchuak takin sum an hmang thei lo a, hei vang hian striker ṭha lakluh nana sum thehchhuak hnem turin an inpaih thawlte pawh a ṭul dawn a ni.

Tu nge Onana?

Manchester United hel lai Andre Onana hi Cameroon thingtlang khua Nkol Ngok-ah kum 1996 khan a piang a, an khuaa mi cheng zat hi 500 vel lek an ni. Nkol Ngok aṭannga darkar li vel kalah Douala khua a awm a, helai hmunah hian Cameroon football legend Samuel Eto'o chuan academy a siam.

Onana hi Eto'o academy aṭangin a inzir a, kum 2010 khan kum 14 mi niin Barcelona a zawm. EU citizen a nih loh bakah Under 18 a la nih avangin loan hmangin Cornella youth team-ah a kal a, hemi season zawh hian Vista Alegre first team-ah a khel leh bawk.

Catalan club aṭangin January 2015-ah Ajax a zawm a, February aṭangin Jong Ajax (Ajax reserve team) tan a khel ṭan. Eerste Divisie-ah Jong Ajax tan hmun pawimawh a chang a, kum 2016 aṭangin Ajax senior team-ah a khel ṭan.

Ajax-a a awm lai hian Erik ten Hag hnuaiah kum thum chhung a awm. Onana hian damdawi hman phal loh a hman avangin thla kaw chhung an hrem a, kum khat chhung hrem tura tih niin thla kuaah an tihhniamsak.

Hremna a hman zawh hnu hian Onana leh Ten Hag hi an inhmu thiam lo a, Dutch manager hian Onana hi a taksa vawng ṭha tawk loah a puh. Chutihrualin Onana hian Ajax-ah record ṭha tak a nei a; Eredivisie-ah vawi thum a champion bakah KNVB Cup vawi hnih a chawi a, Europa League-ah pahnihna a nihpui bawk.

Nikum July thla khan Onana hian Inter Milan a zawm a, nikum November khan Cameroon aiawhin World Cup-ah a zin. Qatar-ah hian head coach Rigobert Song nen intithiam loin inelna zawh hmain a haw. Kum 27 mi Onana hi enkawl awlsam a ni dawn lo a, chutihrualin Ten Hag hian a zia a hriatchian ang bawkin a theihna a hria.

Onana hian Man United chhuahsan ta David de Gea ang lo takin a pawlte goal nawrpui nuam a ti a, a ke a hmang thiam êm êm bawk. Kumin UCL final-ah Onana-a'n Man City lakah a theihna a pholang a, hei hian a itawmna a tizual.

Season liam ta khan Inter tan Onana hian pass vawi 1000 chuang a nei a, 81.3% a dik - a record hi midfielder tan pawh a chhe lo. Hei tak hi Man United-in De Gea meuh chhuahtir a, an hel chhan pawh niin a lang.