Djokovic-a pawisa an chawitir

Novak Djokovic chu Wimbledon final an khelh ṭuma a nungchang mawi lo vangin pawisa chawitir a ni. Serbian star hi £6,117 (Rs 6,56,612.82) an chawitir bakah an zilh.

July 16, Pathianni zana khelh zawh tak Wimbledon final-ah khan, set nga an khelh laiin game thumnaah Djokovic hian a service a hloh, a thinrim chuan net thlunna ban chu a racquet hmangin a vua a, racquet hi a chhe nghal a ni.

Match umpire Fergus Murphy chuan Djokovic hi a zilh a, hei bakah hian pahnihna lawmman a dawn tur £1.175m aṭangin pawisa hi an lak ṭhensak a ni, a thiltih avang hian a hmuna entu mipui pawhin an lawm lo tih a lang.

Serbian star hian Grand Slam nomawi 24 lak a tumna chu Alcaraz lakah a thamral ta rih a, tun season tawp lama khelh tur US Open-ah pawh Spanish tlangval nen bawk hian inelna hmuhnawm an chhawpchhuah leh a rinawm.