Rice hi team khaidingtu tur a ni - Arteta

Arsenal manager Mikel Arteta chuan an player thar Declan Rice lakah beisei a nei sang hle a, pound maktaduai 105 zet senga an lakluh England international midifielder chu an team khaipa pawimawh a nih tur thu a sawi.

Kum 24 mi Rice bakah hian tun nipui chhungin Kai Havertz leh defender Jurrien Timber te an lalut, an player thar pathum ho hian season thar inbuatsaih turin United States lamah hun an hmang.

Season hmasa khan Gunners hi hun rei tak chhung chu Premier League hmahruaitu an ni, mahse, a tawp lamah chesualin Manchester City an tluk lo, season tharah Citizens el phak nih leh ngei an tum.

Arteta chuan, "Declan Rice hi ka hmuh dan chuan mimal ṭha a ni satliah lo a, midangte ṭha lehzual tura pui theitu a ni bawk a, amah mai ni loin team a ti ṭha zual ngei ang tih ka ring nghet tlat.

"Kan sawi khawm ve ṭhin a, hlawhtlin châka tuihal player kan ngah a, heng mite hi Rice hian a rawn ti ṭha dawn. Tawnhriat a nei ṭha a, a thluak a ṭhat bakah tharum a nei tel bawkte hi a ṭangkai zual dawn.

"Thil tum mumal tak a nei a, hun rei lote chhunga kan hnena a chetvel dante hian min tilawm, a rilru puthmang ang hi kan team mamawh tak a ni," tiin a sawi a, a player thar lakah beisei a nei sang hle.

Spanish manager Arteta hian tun nipui chhunga bazar nan pound maktaduai 200 chuang a hmang tawh. Premier League club zingah sum hmang hnem ber an ni mek, season thar chu an lakah beisei an nei sang zual dawn - pressure an nei tawh ang.

Tun hnai khan Arsenal manager ropui ni ṭhin Arsene Wenger chuan season thar hi Gunners tan champion theihna hun ṭha a nih tur thu a lo sawi tawh a, he thu hi Arteta pawhin a pawmpui.

Arteta chuan, "Ka beisei takzet, season hmasa pawh khan hun rei tak chhung ṭha takin kan khel thei a ni. Mi tam tak pawhin min beisei tih ka hria, a tawpa pawimawh ber erawh match zawng zawng ṭha taka khelh a ni dawn.

"Player pawimawh tak tak tur kan lalut a, keini ang bawkin team dang pawhin an ṭhat tawk lohna lai an thuam chak. Keini chu Arsenal kan ni a, kan hmabaka tih tur awm hi kan hlen chhuak thei ang," tiin a sawi.

Gunners manager hian an player mamawh pathum an lei fel hma thei chu lawmawm a tih thu a sawi a, an khelh dan phung an hriat theih nana season thar inbuatsaihna hun an hman pui thei chu a lawmawm zual lai a ni tih a sawi bawk.

Season thar inbuatsaih nan North London club hian Ningani zing dar 6:00 hian MLS All-Star an hmachhawn dawn, chumi hnuah Manchester United, Barcelona leh AS Monaco an hmachhawn leh ang.

Manchester City nena Community Shied an inchuh tur chu season thar khuhhawnna a ni ang - Premier League match hmasa ber atan chuan August 12, Inrinni tlaiah Nottingham Forest an mikhual dawn a ni.