Silly Point : Pên khat tê têin

India team lamin West Indies an tlawhna lamah ṭhangthar Yashasvi Jaiswal-a'n a hmaa hun remchang inchhawp chu kut khing hniha lo banin, debutant centurian a ni nghal. Ni e, tun hma West Indies hranlai ang kha tuna mite hian pha tawh lo mah se, international century hi chu a nep thei lo hrim hrim.

Mizo ṭhangthar

Hmanni lawkah Ramhlun Venglai rawlthar Joseph Lalthankhuma chu Duleep Trophy lamah, North East Zone aiawh turin Mizoram aṭanga thlan a ni tawh. Tunah 50 overs Deodhar Trophy atan a ṭhianpa, Dawrpui Vengthar rawlthar, wicket keeping batsman Jehu Anderson chu India hmar chhak aiawh team-a Mizoram player thlan zingah a tel ve leh ta.

Tin, a vanneihna êm êm chu Mizoram Cricket hruaitu zinga mi, kan Mizoram Gorkha lama mi thawhhlawk Raj Kumar Joshi, Falkland chuan manager hna a chelh ang.

I rilru siamfel la, i taksain a zui mai ang

Naute leh a hminga kan lo hrual ve ṭhin te zingah, thurawn, zawhna, titi leh ngaihdan min zawt leh ka hmuh dan hrilh hre tura ka hun hman tam ber zingah pawh heng an hming kan thailan Joseph leh Jehu-a te hi an tel hial awm e.

Hetia professional cricket lama ka boot ka khai tawh hnu pawn an la bang chuang lo a, inhmuh ni leh phone hmang leh remchan apianga hun insiam tum an ni ṭhin. Kar hmasa liam ta lawk khan, Jehu Anderson hi kan inah lo lengin, ka tawnhriat ve aṭanga tun aia thleng sang tura harsatna leh mu tan nia a hriat te min titi pui duh.

Zep thu a cheng lo, skills leh technique-ah chuan keimah min khum vekte an ni. Cricket game hi team inelna ni si a, mimala pen chhuah ngaihna, infiamna mak tak hi a ni ve hrim hrim. A tawi zawngin, Jehu pawh hi, a rilru a dah fel chuan, a taksa leh a thiamnain automatic-in a zui nghal mai dawn a ni tih bak hrilh vak tur ka hre lo.

A hringtu pain a boralsan aṭanga tumruhna nasa zawk a neih dan te, age group level aṭanga tun ang dinhmun thleng tura a taimaknate hmu ve zinga mi ni vein ka inhria.

Mizoram tihmingṭha tur leh he cricket meichher tinunga tialh zau zel turin Jehu Anderson duhsakna ka hlan e.