Alcaraz dinhmun a nghet

Wimbledon champion Carlos Alcaraz chuan world ranking lamah pawh a dinhmun a sawhnghet. Mipa tennis thuneitu sang Association of Tennis Professionals (ATP) ranking chhuak thar berah pawh a chung berah a awm chhunzawm.

Kum 20 mi Alcaraz hian Novak Djokovic hnehin Wimbledon title a la a, grass court inelna liana a champion vang hian ranking point 2000 a hmuh belh a, amah hnaih bertu aiin point 880 zetin a sang ta rih a ni.

Spanish star hian season a hmang ṭha a, kum tawpa a thiam zual pariat inelna Nitto ATP Finals khel turin a tling der tawh. Turin khawpui pan theihna tur ticket nei fel hmasa ber a ni nghal bawk.

World number 1 Alcaraz chuan, "Tun season tawpah Turin-a ka inkhel thei tur hi ka lawm, kumin bul kan ṭan tirh aṭanga ka thil tum zinga mi a ni," a ti. Season hmasa khan hliam vangin ATP Finals hi a khel thei lo, kuminah a inlan chuan a vawi khatna tur a ni ang.

Kuminah nomawi paruk a chawi tawh a, chung zingah chuan Wimbledon bakah hian ATP Masters 1000 pahnih - Indian Wells leh Madrid bakah Barcelona Open, Queen’s Club leh Buenos Aires Open-ah te a hlawhtling vek a ni.