Bayern technical director tur Freund

Bayern Munich chuan technical director atan Christoph Freund an lalut dawn a, German chanchinbu lian Bild-in a tarlan danin September aṭangin Freund hian hna a ṭan ang.

Kum 46 mi Freund hian Austrian club RB Salzburg-ah Sporting Director hna a chelh mek a, nikum nipui khan Chelsea nen pawh sawizawm a ni.

Bayern hian season liam ta khan treble champion thei dinhmuna an din laiin manager Julian Nagelsmann chu banin Thomas Tuchel an lalut. Hemi hnu hian DFB Pokal leh Champions League-ah an tla nghal a, Bundesliga-ah pawh Borussia Dortmund chetsual zarah an champion hram.

Bavarians thuneituten thutlukna danglam tak siamtu CEO Oliver Kahn leh sporting director Hasan Salihamidzic an ban.

Bayern hian CEO atan Jan-Christian Dreesen an tifel tawh a, technical director thar tur Freund nen club din ṭhat hna an thawk dawn a ni.