Hmasawnna tur ka la nei - Gundogan

Ilkay Gundogan chuan Barcelona a zawm hnuah hmasawnna tur a la nei tih a sawi a, season tharah Catalan club nena chona thar hmachhawn chu a châk tawh hle tih a sawi bawk.

German midfielder hi kum 32 mi a ni tawh a, a vanglai a pel ve mek. Season hmasa khan Manchester City captain niin a club hi Champions League, Premier League leh FA Cup a lakpui vek a ni.

Citizens tan a contract a hmang zo a, chona thar hmachhawn turin Barcelona a pan - Spanish club tan hian season hnih daih contract a ziak, a club thar hi La Liga champion lai an nih avangin nomawi chawi an beisei ngam nghal ang.

Ilkay Gundogan chuan, "Ka kum a tam deuh tawh chung hian chona hmachawn ka la châk a, ka phurin hmasawnna tur lai pawh ka la nei," a ti a, a club thar khelh dan chu Pep Guardiola-a'n Man City a khelhtir dan nen a inang tih a sawi bawk.

Gundogan chuan, "Guardiola leh Xavi te hian inanna tak an nei, kan inbiak vawi khatna aṭang khan Xavi nen hian kan inpawh nghal hle. Ram hranah, league hran daih ka khel leh thei tur hi ka phur hle.

"Champions League nomawi chawi kan tum dawn, a chhan chu Barcelona jersey kan ha a nih chuan inelna sang bera hlawhtlin kan tum tur a ni ang, chuvangin kei pawhin theihtawp chhuahin nomawi tam thei ang ber chawipui ka tum ang," a ti.