Fulham-ah Willian a khelh chhunzawm dawn

Brazilian winger Willian chuan Fulham-a cham chhunzawm zel turin contract thar a ziak a, London club-ah hian kum khat dang a la khel leh dawn.

Kum 34 mi forward hi season zawh rualin Fulham-a a contract a hmang zo a, a duh lam club be tura zalenna a neih avangin Nottingham Forest nen sawizawm a ni hman.

Mahse, a tawpah Fulham-a cham a thlang a, London club-ah kum khat dang a cham belh dawn - a contract hi a ṭul dan a zira kum khat dang pawhsei theih a ni.

Willian chuan, "Ka hlim takzet a, ka khelhpui leh he team pumpuia ka thawhpuite nena season hmasa lama kan hnathawh ka chhunzawm thei tur hi ka lawm hle.

"Season hmasa aiin tun season-ah kan tihṭhat lehzual theih ka beisei a, chuvang chuan he zinkawng zawh chhunzawm zel tur hian ka phur êm êm a ni," a ti a, Fulham-a a cham thei tur chu a lawm thu a sawi.

Chelsea leh Arsenal tan pawha khel tawh Willian hian August 2022 khan Brazilian club Corinthians chhuahsanin, Fulham hi free transfer-in a zawm a, season hman zawh takah khan Fulham tan hian league match 27 khela goal nga khungin, assist vawi ruk a nei.

Willian hi Chelsea tana Premier League nomawi pahnih, FA Cup pakhat, League Cup (1) leh Europa League (1) pawh lo chawi tawh a ni a, a tawnhriat ringawt pawh hi Fulham tan a hlu - Brazil tan match 70 khelin, goal kua a khung tawh.