Beisei loh hna thawk tur Barca coach thar Setien

Barcelona chuan an coach  Ernesto Valverde an ban hnuah Thawhlehni zan khan coach thar Quique Setien chu media hmaah an tlangzarh a, Setien chuan, "Ka mumangah tak ngial pawh ka mang ngai lo," tiin Catalan club a enkawl tur chu a tan chawimawina a nih thu a sawi. 

Nou Camp-a kum hnih leh a chanve cham tura contract ziaktu chuan, "Club chungah ka lawm takzet. Ka hmaa chona inchhawp leh ruahmanna awm te hian min ti phur hle a ni," a ti a, club ropui Barcelona-ah thamral mai 

a tum lo. Kum 61 mi nichunga a vawi khat nana top club enkawl tur Setien chuan, "Nimin maiah kha chuan kan khuaah min hual veltu chu bawng niin ka tei vel mai mai a, vawiinah erawh khawvela player ṭha ber ber enkawl turin Barcelona-ah ka awm leh ta mai si," a ti a, a lawmna a luangliam. 

Setien chuan, "La Liga hmahruai mektu club min hnutchhiah avangin Valverde chungah lawmthu ka sawi duh. Ka tum ber chu hnehna kan chan theihna zawng zawnga chan vek a ni a, he club hian chu lo chu kawng dang a nei lo," a ti! Coach hna a thawh hnua nomawi chawi la nei ngai lo manager chuan, "Nomawi a tam thei ang ber chawi ka duh a, chumi tur chuan football hmuhnawm tak kan phochhuah a ngai dawn a ni. Engtiklai pawha khelh ṭhat theih a ni lo tih ka hria a, mahse theihtawp chhuah reng erawh a pawimawh a ni," a ti a, nomawi chawi loh a duh lo. 

Valverde hnuaiah Barca hian a zawnin league nomawi an chawi a, hmahruaitu an ni mek bawk. November 2 hnu khan La Liga-ah an tlawm leh tawh lo a, Champions League group stage-ah Borussia Dortmund leh Inter Milan an awmpui chungin hmahruaitu an ni bawk. Heng zawng zawng hi Valverde chhan turin a tling tawk lo a, Setien tan pressure a san loh ring suh.

Setien hian fak a hlawhna ber chu Barcelona 'football' kalphung a kalpui hi a ni a, Spanish division hniam lama club a enkawl lai chuan 'Barcelona of lower division' tiin a club-te chanchin an sawi ṭhin. Real Betis boss hlui chuan, "Barca hian min duh ang tih ngaihtuahna reng reng ka nei lo. Sulhnu ropui ka nei lo a, mahse khelh dan phung ngainat sa em em ka nei thung. Chu ka theihna chu Barca tan hian a tawk ang em ka hre lo a, lawm erawh ka lawm takzet a ni," a ti. 

Barca hian Setien bakah hian club legend Xavi, Ronald Koeman, Gabriel Milito leh Mauricio Pochettino te pawh an bia a, club talbuai hi heng coach te hian an hnar vek niin khawthlang media te chuan an tarlang.